اتر پردیش: دلت بہنوں پر ایسڈ اٹیک کے لیے پرینکا گاندھی نے یوگی کو ٹھہرایا ذمہ دار

اتر پردیش کے گونڈا میں تین دلت بہنوں پر ایسڈ اٹیک کے واقعہ کو لے کر کانگریس جنرل سکریٹری پرینکا گاندھی نے ریاست کی بی جے پی حکومت پر حملہ بولتے ہوئے واقعہ کے لیے وزیر اعلیٰ یوگی آدتیہ ناتھ کو ذمہ دار ٹھہرایا ہے۔ انھوں نے کہا کہ "گونڈا ایسڈ اٹیک معاملہ میں 17 سال، 10 سال اور 8 سال کی بیٹیاں اپنے گھر میں سو رہی تھیں، تبھی کسی نے ان کے گھر میں داخل ہو کر ان پر ایسڈ پھینک دیا۔"

پرینکا گاندھی نے ریاست میں خواتین کے خلاف جرائم کے بڑھتے گراف کو لے کر وزیر اعلیٰ یوگی آدتیہ ناتھ پر حملہ کرتے ہوئے کہا کہ "اتر پردیش حکومت خواتین کے ساتھ جرائم کرنے والے افسران کو درست ٹھہرانے اور ان کی حفاظت کرنے کا کام کر رہی ہے، اس کے سبب پوری ریاست میں جرائم بڑھ رہے ہیں۔"

اس واقعہ کو لے کر کانگریس نے اپنے رد عمل میں کہا کہ گونڈا ضلع کے پسکا گاؤں میں تین نابالغ دلت بہنوں کو تیزاب سے جلائے جانے کے واقعہ سے معلوم ہوتا ہے کہ ریاست میں نظام قانون کس طرح تباہ ہو گیا ہے۔ اتر پردیش کانگریس صدر اجے کمار للو نے الزام عائد کیا کہ "یوگی راج میں دلتوں پر مظالم ہو رہے ہیں، کیونکہ حکومت خود کو بچانے کے لیے جرائم پیشوں کو بچا رہی ہے۔ ایسے میں جرائم پیشے ریاستی حکومت سے کیوں ڈریں گے۔"