وزیر اعظم نریندر مودی کا اپنے پاکستانی ہم منصب کے نام مکتوب قابل تحسین: محبوبہ مفتی

محبوبہ مفتی نے کہا کہ پی ایم مودی کا اپنے پاکستانی ہم منصب کے ساتھ رابطہ کرنا صحیح سمت میں اٹھایا جانے والا قدم ہے۔ جیسا کہ واجپئی جی نے بھی کہا تھا کہ دوستوں کو بدلا جا سکتا ہے لیکن ہمسایوں کو نہیں۔

محبوبہ مفتی / آئی اے این ایس
محبوبہ مفتی / آئی اے این ایس
user

یو این آئی

سری نگر: پی ڈی پی صدر اور سابق وزیر اعلیٰ محبوبہ مفتی نے وزیر اعظم نریندر مودی کا اپنے پاکستانی ہم منصب عمران خان کے نام مکتوب کو صحیح سمت میں اٹھایا جانے والا قدم قرار دیتے ہوئے کہا کہ اس سے دونوں ممالک کے درمیان بات چیت کا عمل بحال ہوسکتا ہے۔

انہوں نے کہا کہ سابق وزیر اعظم اٹل بہاری واجپئی نے بھی کہا تھا کہ دوستوں کو بدلا جا سکتا ہے لیکن ہمسایوں کو نہیں۔ موصوفہ نے ان باتوں کا اظہار بدھ کے روز اپنے ایک ٹوئٹ میں کیا جو انہوں نے وزیر اعظم نریندر مودی کے اپنے پاکستانی ہم منصب عمران خان کے نام ’یوم پاکستان‘ کے موقع پر ارسال کیے گئے خط کے رد عمل میں کیا۔


محبوبہ مفتی نے اپنے ٹوئٹ میں کہا کہ ’وزیر اعظم مودی کا اپنے پاکستانی ہم منصب کے ساتھ رابطہ کرنا صحیح سمت میں اٹھایا جانے والا ایک قدم ہے۔ جیسا کہ واجپئی جی نے بھی کہا تھا کہ دوستوں کو بدلا جا سکتا ہے لیکن ہمسایوں کو نہیں۔ مجھے امید ہے کہ اس اقدام سے دونوں ممالک کے درمیان بات چیت کا عمل شروع ہوگا کشمیر کو مرہم کی ضرورت ہے‘۔

قابل ذکر ہے کہ وزیر اعظم نریندر مودی نے ’یوم پاکستان‘ کے موقع پر اپنے پاکستانی ہم منصب عمران خان کو ایک خط ارسال کیا ہے جس میں کہا گیا ہے کہ بھارت پاکستانی عوام سے خوشگوار تعلقات کا خواہشمند ہے۔ قبل ازیں پاکستان کے فوجی سربراہ جنرل قمر جاوید باجواہ نے کہا تھا کہ دونوں ممالک کو مسائل کے حل کے لئے بات چیت کا عمل شروع کرنا چاہیے۔ سیاسی مبصرین اس خط کو دونوں ممالک کے درمیان تعلقات میں بہتری ہونے کی نوید تصور کرتے ہیں۔

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔