کانگریس کے یوم تاسیس پر صدر سونیا گاندھی کا پیغام ’ملک میں آمریت رائج، عوام میں عدم تحفظ کا احساس‘

سونیا گاندھی نے کہا کہ کانگریس کسی کو ملک کی وراثت کو تباہ کرنے کی اجازت نہیں دے گی، عام شہریوں کی خاطر، جمہوریت کے دفاع کے لیے، ملک اور سماج کے تئیں سازشوں کے خلاف ہر جدوجہد کرے گی، ہر قربانی دی گی

کانگریس صدر سونیا گاندھی / قومی آواز / وپن
کانگریس صدر سونیا گاندھی / قومی آواز / وپن
user

قومی آوازبیورو

نئی دہلی: کانگریس پارٹی آج اپنا 137واں یوم تاسیس منا رہی ہے۔ اس موقع پر ملک کی متعدد ریاستوں میں تقاریب منعقد کی گئی ہیں۔ قومی راجدھانی دہلی میں واقع کانگریس کے صدر دفتر پر بھی تقریب کا انعقاد کیا گیا، جس میں کانگریس صدر سونیا گاندھی نے پرچم کشائی کی۔ اس دوران راہل گاندھی، پرینکا گاندھی سمیت کانگریس کے کئی سینئر لیڈران موجود رہے۔

کانگریس کے یوم تاسیس پر کانگریس صدر سونیا گاندھی نے قوم کے نام ایک پیغام بھی جاری کیا ہے۔ اپنے اس ویڈیو پیغام میں کانگریس صدر نے کہا کہ کانگریس نہ صرف ایک سیاسی جماعت کا نام ہے بلکہ ایک تحریک کا بھی نام ہے۔ ہم سب جانتے ہیں کہ کانگریس کن حالات میں قائم ہوئی تھی۔ کانگریس ارٹی کے لیڈروں نے تحریک آزادی میں لڑائی لڑی۔ مجاہدین آزادی کو جیلوں میں سخت اذیت کا سامنا کرنا پڑا اور بہت سے لوگوں نے اپنی جانیں قربان کر دیں، اس کے بعد جاکر کہیں آزادی حاصل ہوئی۔


سونیا گاندھی نے مزید کہا کہ ہمیں آزادی کے بعد جو ہندوستان حاصل ہوا اس کا تصور بھی نہیں کیا جا سکتا۔ ہمارے قائدین نے دانشمندی سے ہندوستان کی تعمیر کے لئے بنیاد رکھی، جس پر عمل کرتے ہوئے ہم نے ایک مضبوط ہندوستان تعمیر کیا۔ ایک ایسا ہندوستان جس میں تمام ہموطنوں کے حقوق اور مفادات کا خیال رکھا گیا۔ تحریک آزادی میں حصہ نہ لینے والے اس کی قدر نہیں سمجھ سکتے۔

آج ہندوستان کی اس مضبوط بنیاد کو کمزور کرنے کی ہر ممکن کوشش کی جا رہی ہے۔ تاریخ کو مسترد کیا جا رہا ہے۔ ہماری گنگا-جمنی ثقافت کو ختم کرنے کی کوششیں کی جا رہی ہیں۔ ملک کا عام شہری خود کو غیر محفوظ اور خوفزدہ محسوس کر رہا ہے۔ ملک میں آمریت رائج ہے اور جمہوریت اور آئین کو پامال کیا جا رہا ہے۔ ایسے حالات میں میں کانگریس خاموش نہیں رہ سکتی۔


سونیا گاندھی نے کہا کہ کانگریس کسی کو ملک کی وراثت کو تباہ کرنے کی اجازت نہیں دے گی۔ عام شہریوں کی خاطر، جمہوریت کے دفاع کے لیے، ملک اور سماج کے تئیں ہر سازشوں کے خلاف جدوجہد کرے گی، ہر قربانی دے گی۔ آج کانگریس کے ہر فرد کو پارٹی کو مضبوط بنانے کا عہد کرنا ہوگا۔

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔