دہلی میں لال قلعہ کے قریب کار میں زوردار دھماکہ، 13 افراد جاں بحق، درجنوں زخمی، ممبئی میں الرٹ

دہلی میں لال قلعہ کے قریب ایک ’ایکو وین‘ میں زوردار دھماکہ ہوا ہے، جس نے پورے علاقے میں افرا تفری کا ماحول پیدا کر دیا ہے۔ دھماکہ میں کم از کم 13 لوگوں کی ہلاکت سے متعلق تصدیق ہو چکی ہے، جبکہ درجنوں افراد زخمی بھی ہوئے ہیں۔ زخمیوں میں کچھ کی حالت انتہائی سنگین بتائی جا رہی ہے۔ مہلوکین کی لاشیں ایل این جے پی اسپتال میں لے جایا گیا ہے اور بتایا جا رہا ہے کہ مہلوکین کی تعداد بڑھ سکتی ہے۔

میڈیا رپورٹس کے مطابق دھماکہ بہت تیز تھا، اور اس کا اندازہ اسی بات سے لگایا جا سکتا ہے کہ قریب میں کھڑی 6-5 گاڑیوں کے پرخچے اڑ گئے۔ این اے آئی کی ٹیم جائے وقوع پر پہنچ گئی ہے اور جانچ بھی شروع کر دی گئی ہے۔ دہلی پولیس نے بھی اپنی طرف سے تحقیقات شروع کر دی ہے۔ فورنسک اور ٹیکنیکل ایکسپرٹ جلد ہی حادثہ والی جگہ پر پہنچنے والے ہیں، جو یہ پتہ لگائیں گے کہ آخر یہ دھماکہ کیوں ہوا۔ بتایا جا رہا ہے کہ فائر بریگیڈ کے پاس دھماکہ کی خبر 6.55 بجے شام میں آئی تھی۔ دھماکہ کی وجہ سے آس پاس کی اسٹریٹ لائٹس بھی ٹوٹ گئیں۔

موصولہ اطلاع کے مطابق لال قلعہ میٹرو اسٹیشن کے گیٹ نمبر 1 کے پاس یہ دھماکہ ہوا جس میں کم از کم 24 افراد کے زخمی ہونے کی خبر سامنے آ چکی ہے۔ اس دھماکہ میں کئی دکانوں کو بھی شدید نقصان پہنچا ہے۔ دھماکہ کے بعد پوری دہلی میں ہائی الرٹ کا اعلان کر دیا گیا ہے۔ جس طرح کے حالات ہیں، اس سے یہ ظاہر ہوتا ہے کہ یہ بڑی سازش بھی ہو سکتی ہے۔ احتیاطاً چاندنی چوک مارکیٹ کو بند کر دیا گیا ہے اور لال قلعہ کے آس پاس کے پورے علاقے اور سڑکوں کو بھی بند کر دیا گیا ہے۔

بتایا جاتا ہے کہ دھماکہ کے بعد کار میں شدید آگ لگ گئی اور اس کی زد میں دیگر 8-7 گاڑیاں بھی آ گئیں۔ دھماکہ کی جو تصویریں سامنے آئی ہیں، وہ پریشان کرنے والی ہیں۔ جس وقت یہ دھماکہ ہوا، اُس وقت وہاں پر بہت بھیڑ تھی۔ دھماکہ کار میں لگی سی این جی سے ہوا، یا پھر کسی دوسری وجہ سے، اس کا فی الحال پتہ نہیں چل سکا ہے۔ فائر بریگیڈ کی گاڑیوں نے موقع پر پہنچ کر آگ پر قابو پانے کی کوششیں شروع کر دی ہیں۔

دہلی میں ہوئے اس دھماکہ کے بعد دہلی میں تو ہائی الرٹ کا اعلان کر ہی دیا گیا ہے، ممبئی میں بھی پولیس الرٹ ہو گئی ہے۔ شہر کے حساس علاقوں میں پیٹرولنگ اور ناقہ بندی بڑھا دی گئی ہے۔ ریلوے اسٹیشنوں، مالز، مذہبی مقامات اور عوامی مقامات پر پولیس فورس تعینات کر دیے گئے ہیں۔ کسی بھی ناخوشگوار واقعہ کو روکنے کے لیے احتیاطی اقدام کیے جا رہے ہیں۔ دوسری طرف اتر پردیش میں بھی ہائی الرٹ جاری کر دیا گیا ہے۔ اتر پردیش میں اہم مقامات، بازاروں، مذہبی مقامات، بھیڑ بھاڑ والے علاقوں میں سخت نگرانی کی جا رہی ہے۔ اتر پردیش کے وزیر اعلیٰ یوگی آدتیہ ناتھ نے ہدایت دی ہے کہ پولیس ڈرون سے ہر جگہ نظر رکھے اور نگرانی ایجنسیاں تکنیکی سرگرمیوں پر توجہ مرکوز کرے۔ نوئیڈا اور غازی آباد کی پولیس کو بھی الرٹ رہنے کے لیے کہا گیا ہے۔