پہلوانوں کی حمایت میں آج دہلی میں کئی کھاپ کے لوگ آئیں گے، پولس الرٹ

جنتر منتر پر احتجاج کرنے والے پہلوانوں کو عوام کی حمایت مسلسل مل رہی ہے۔ ایک طرف ہریانہ کی کھاپ پنچایتوں نے تحریک کی حمایت کا اعلان کیا ہے تو دوسری طرف اب پہلوانوں کو کسانوں کی بھی حمایت مل رہی ہے۔ جنتر منتر پر کسانوں کی تنظیموں اور پنجاب کی سیول تنظیموں کے بینرز آویزاں ہیں۔ کئی ریاستوں کی کھاپ پنچایتوں کے لوگوں کی ایک بڑی تعداد کا  آج دہلی آنے کا امکان ہے۔ اس سلسلے میں دہلی پولیس الرٹ موڈ پر آگئی ہے ۔ تمام سرحدوں پر بھاری نفری تعینات کر دی گئی ہے۔ نیوز پورٹل آج تک پر شائع خبر کے مطابق حکام نے دہلی میں امن و امان کے بگڑنےکی صورت میں سخت کارروائی کرنے کا حکم دیا ہے۔ امن و امان خراب کرنے والوں کو حراست میں لینے کا حکم ہے۔

دراصل، کسان لیڈر راکیش ٹکیت پہلوانوں کے درمیان پہنچے اور کسانوں سے احتجاج کی حمایت کرنے کی اپیل کی۔ اس کے بعد اب یہاں کسان تنظیم کے بینرز لگنے لگے ہیں۔ ساتھ ہی بتایا جا رہا ہے کہ پنجاب، ہریانہ اور مغربی یوپی کی کھاپ پنچایتوں کے لوگ آج جنتر منتر پہنچیں گے۔ کھلاڑیوں کو انصاف دلانے کے لیے دھرنے پر پہنچنے کے بعد کھاپ کے چوہدری آگے کی حکمت عملی تیار کریں گے۔

راکیش ٹکیت نے بتایا کہ اتوار کو اتر پردیش، ہریانہ، راجستھان اور پنجاب کے کھاپ کے چودھری جنتر منتر پر چل رہے کھلاڑیوں کے دھرنے پر پہنچیں گے۔ وہ مظفر نگر ضلع کے کھاپ چودھریوں کے ساتھ دہلی کے لیے بھی روانہ ہوں گے۔پولیس کے پاس ایسی معلومات ہیں کہ ہریانہ، اتر پردیش اور پنجاب سے بڑی تعداد میں لوگوں کے آنے کی امید ہے۔

پولیس ہریانہ کی سرحد سے دہلی کی سرحد میں داخل ہونے والے تمام راستوں پر رکاوٹیں لگا کر چیک کرے گی اور چیکنگ کے بعد ہی گاڑیوں کو دہلی میں داخل ہونے دیا جائے گا۔ اگر کسی گاڑی میں خیمے، راشن اور اس طرح کی کوئی دوسری چیز پائی گئی تو اسے ضبط کر لیا جائے گا۔ اس گاڑی کو دہلی میں داخل نہیں ہونے دیا جائے گا۔ خواتین پولیس اہلکاروں کی بڑی تعداد بھی سرحد پر تعینات کی جائے گی۔

ہفتہ کو پہلوانوں نے ایک بار پھر پریس کانفرنس کی جس میں انہوں نے حمایت کے لیے آنے والی کسان اور طلبہ تنظیموں سے پرامن رویہ اپنانے کی اپیل کی۔ انہوں نے کہا کہ کسان اور طلبہ تنظیمیں دہلی کی طرف بڑھ رہی ہیں۔ ہم ان تمام تنظیموں سے اپیل کرتے ہیں کہ وہ پولیس کے ساتھ تعاون کریں۔ برائے مہربانی پرامن رہیں، قانون اپنے ہاتھ میں نہ لیں۔

سورو گنگولی کے بیان پر ونیش پھوگاٹ نے کہا کہ کھیل ہمیں اپنا خیال رکھنا نہیں سکھاتے۔ اگر سورو گنگولی ہمارا مسئلہ سمجھنا چاہتے ہیں تو وہ ہم سے رابطہ کر سکتے ہیں۔ ہم ان کے پاس نہیں جا سکتے۔ دراصل گنگولی نے کہا تھا کہ پہلوانوں کو اپنی لڑائی لڑنے دو، مجھے نہیں معلوم کہ وہاں کیا ہو رہا ہے، میں نے صرف اخبارات میں پڑھا ہے۔ کھیلوں کی دنیا میں مجھے ایک چیز کا احساس ہوا کہ آپ ان چیزوں کے بارے میں بات نہیں کرتے جن کے بارے میں آپ کو مکمل علم نہیں ہے۔

جنتر منتر پر 23 اپریل سے ریسلنگ ایسوسی ایشن کے صدر برج بھوشن شرن سنگھ کے خلاف پہلوان احتجاج کر رہے ہیں۔ پہلوانوں نے برج بھوشن پر جنسی ہراسانی کا الزام لگایا ہے اور ان کی گرفتاری کا مطالبہ کر رہے ہیں۔