گلوکار راہل فاضل پوریہ پر حملہ کرنے آئے بدمعاشوں سے پولیس کا انکاؤنٹر، 5 شارپ شوٹر گرفتار، 4 کو لگی گولی

بالی ووڈ گلوکار راہل فاضل پوریہ کے قتل کے ارادے سے گرو گرام آئے 5 شوٹروں کو ایس ٹی ایف نے گرفتار کرلیا ہے۔ بتایا جا رہا ہے کہ یہ بدمعاش بیرون ملک میں بیٹھے گینگسٹروں سے رابطے میں تھے۔ ایس ٹی ایف کو ان حملہ آوروں کا اِن پٹ ملا تھا اس کے بعد بدھ کو کارروائی کی گئی۔

’آج تک‘ کی خبر کے مطابق ایس ٹی ایف اور کرائم برانچ گروگرام کو اطلاع ملی تھی کہ بیرون ملک میں بیٹھے گینگسٹر گلوکار راہل فاضل پوریہ کے قتل کی سازش کو انجام دینے والے ہیں۔ اطلاع ملنے کے بعد گرو گرام ایس ٹی ایف اور گروگرام پولیس کی نصف درجن کرائم یونٹس کے تمام افسروں نے پٹودی روڈ کے وزیر پور علاقے میں جال بچھایا۔ جہاں بغیر نمبر پلیٹ کے اینووا کار پر ٹیم کو شبہ ہوا۔

ٹیم نے جیسے ہی اسے روکنے کی کوشش کی ویسے ہی اینووا میں بیٹھے مسلح بدمعاشوں نے پولیس پارٹی پر فائرنگ شروع کر دی۔ دونوں طرف سے تقریباً 18 راؤند فائرنگ ہوئی۔ تصادم میں 4 بدمعاشوں کو پیروں میں گولی لگی، جس کے بعد پولیس نے پانچ لوگوں کو اپنی گرفت میں لے لیا۔

ایس ٹی ایف گروگرام کے ڈی ایس پی پرتپال سنگھ نے فون پر ہوئی بات چیت میں انکاؤنٹر پر بیان دیا۔ جس کے مطابق گرفتار سبھی بدمعاش بیرون ملک میں بیٹھے گینگسٹر روہت سردھانیہ اور دیپک ناندل کے شارپ شوٹر ہیں۔ جن کی شناخت جھجر کے رہنے والے ونود پہلوان، سونی پت کے رہنے والے پدم عرف راجہ، شوبھم عرف کالا، گوتم عرف گوگی اور آشیش عرف آشو کے طور پر ہوئی ہے۔

گرفتار کیے گئے شوٹروں میں سے 4 کو پیروں میں گولیاں لگی ہیں جنہیں گروگرام کے سرکاری اسپتال میں بھرتی کرایا گیا ہے۔ فی الحال معاملے میں سبھی سے پوچھ تاچھ کی جا رہی ہے۔ ایس ٹی ایف کا دعویٰ ہے کہ پوچھ تاچھ میں کئی بڑے انکشافات ہو سکتے ہیں۔

قابل ذکر ہے کہ راہل فاضل پوریہ پر پہلے بھی حملہ ہو چکا ہے۔ ان پر جولائی میں لکھنؤ میں جان لیوا حملہ ہوا تھا۔ تب بدمعاشوں نے ان پر دو راؤنڈ فائرنگ کی تھی، لیکن گاڑی تیزی سے بھگانے کی وجہ سے ان کی جان بچ گئی تھی۔ ویسے راہل کے فائنانسر کا قتل پہلے ہی کیا جا چکا ہے۔

راہل فاضل پوریہ ہریانوی گانوں کے ساتھ ساتھ بالی ووڈ میں بھی کئی ہٹ گانے گا چکے ہیں۔ عالیہ بھٹ کی فلم ’کپور اینڈ سنس‘ کے گانے ’لڑکی بیوٹی فُل کر گئی چُل‘ سے وہ سرخیوں میں آ گئے تھے، جس کے بعد راہل کی بالی ووڈ میں اچھی شناخت ہو گئی تھی۔