پٹنہ میں دو کمسن بچوں کی موت کے خلاف اہل خانہ کا ہنگامہ

بہار کی راجدھانی پٹنہ میں دو کمسن بچوں کی پراسرار موت نے پیر کو پرتشدد رخ اختیار کر لیا۔ اہل خانہ اور مقامی لوگوں نے اٹل پاتھ علاقے میں ہنگامہ کھڑا کر دیا۔ ہجوم نے پولیس پر پتھراؤ کیا، کئی گاڑیوں کے شیشے توڑ دیے اور وہاں پر آگ لگا کر ماحول کو کشیدہ کر دیا۔

معلومات کے مطابق، یہ واقعہ 5 اگست کو اندرا پوری علاقے میں پیش آیا، جہاں کار کے اندر سے دو نابالغوں کی لاشیں ملی تھیں۔ پولیس کی ابتدائی تفتیش میں دم گھٹنے سے موت کی تصدیق ہوئی ہے تاہم لواحقین اسے مسلسل قتل قرار دے رہے ہیں۔ اس غصے کی وجہ سے پیر کی شام اہل خانہ اور مقامی لوگ سڑک پر آگئے اور پولیس کے خلاف نعرے بازی شروع کردی۔

اس کے بعد مشتعل ہجوم نے پولیس کی گاڑی کو بھی آگ لگا دی اور کئی مقامات پر پتھراؤ کیا۔ حالات بگڑتے دیکھ کر پولیس نے لاٹھی چارج کرکے بھیڑ کو منتشر کردیا۔ اٹل پاتھ پر گھنٹوں افراتفری مچی رہی۔فی الحال علاقے میں پولیس کی بھاری نفری تعینات ہے اور حالات پر قابو پانے کی کوششیں کی جارہی ہیں۔ پولیس حکام کا کہنا ہے کہ واقعے کی غیر جانبداری سے تفتیش جاری ہے اور ملزمان کے خلاف سخت کارروائی کی جائے گی۔ (بشکریہ نیوز پورٹل ’آج تک‘)