کورونا انفیکشن: مہلوکین کی لاش دفنانے پر پابندی کی عرضی پھر پہنچی بمبئی ہائی کورٹ

نئی دہلی: عدالت عظمیٰ نے کورونا وائرس ’كووڈ 19‘ میں جان گنوا چکے مسلمانوں کو قبرستان میں دفن کرنے پر عارضی پابندی لگائے جانے سے متعلق پیر کے روز کیس کو دوبارہ بمبئی ہائی کورٹ کو بھیج دیا جسٹس روهنگٹن فالی نریمن اور جسٹس اندرا بنرجی کی بنچ نے پردیپ گاندھی کی ’اسپیشل لیو پٹیشن‘ (ایس ایل پی) کی ویڈیو کانفرنسنگ کے ذریعہ سماعت کرتے ہوئے یہ معاملہ دوبارہ ہائی کورٹ کو بھیج دیا اور سماعت دو ہفتے میں مکمل کرنے کی ہدایت بھی دی۔

بنچ نے کہا کہ درخواست میں کی گئی مانگ کو مسترد کرنے کا ہائی کورٹ کا حکم عارضی تھا، تو ہائی کورٹ موجودہ تناظرمیں درخواست پر دوبارہ غور کرے۔ درخواست گزار نے کورونا متاثر لاش کو اپنے رہائشی علاقے کے آگے قبرستان میں دفنانے پر عارضی روک کا مطالبہ کیا ہے۔ بمبئی ہائی کورٹ نے گزشتہ 27 اپریل کوپردیپ گاندھی کی یہ درخواست مسترد کر دی تھی، جسے انہوں نے عدالت میں چیلنج کیا تھا۔

درخواست میں کہا گیا ہے کہ یہ قبرستان گنجان آبادی والے علاقہ میں ہے اور یہاں کورونا وائرس سے متاثر لاش دفن کرنے سے علاقے میں مٹی اور پانی کے متاثر ہونے کا اندیشہ ہے، جس سے ارد گرد کے لوگ متاثر ہو سکتے ہیں۔ اسی بنیاد پران قبرستانوں میں ایسی لاشیں دفن کرنے پر فوری روک لگائی جائے۔ ان لاشوں کو ایسے قبرستانوں میں دفن کرنے کی ہدایت دی جائے جو آبادی سے دور ہوں۔

درخواست میں کہا گیا ہے کہ ریاستی حکومت نے 30 مارچ کو ایک سرکلر جاری کرکے کورونا وائرس سے ہونے والی موت کے معاملے میں لاش دفنانے پر روک لگا دی تھی، سرکلر میں کہا گیا تھا کہ وبا کے دوران کورونا وائرس متاثر لاشوں کو جلایا جائے گا، لیکن چند دن بعد نو اپریل کو حکومت نے ایک سرکلر جاری کرکے ایسی لاشوں کو دفن کرنے کی اجازت دے دی۔

سرکلر میں 20 قبرستانوں کو ایسی لاشوں کو دفن کرنے کے لئے نشانزد کیا گیا، ان میں باندرہ (ویسٹ) کے تین قبرستان بھی شامل ہیں، درخواست گزار کی رہائشی کالونی بھی باندرا (ویسٹ) کے قبرستان کے سامنے ہی ہے۔ جمعیۃ علمائے ہند نے بھی ’پردیپ گاندھی بمقابلہ مہاراشٹر حکومت‘ معاملہ میں فریق بننے کی کورٹ سے درخواست کی ہے۔ مسلم تنظیم نے پردیپ گاندھی کی درخواست میں یہ کہتے ہوئے فریق بننے کی اجازت مانگی ہے کہ مسلمانوں کو لاش دفنانے سے منع کرنا آئین میں فراہم کردہ مذہبی آزادی کے بنیادی حق کی خلاف ورزی ہے۔