مدھیہ پردیش کی راجدھانی بھوپال میں لاک اَپ میں لٹکی ملی لاش، عدالتی جانچ کا حکم

مدھیہ پردیش کی راجدھانی بھوپال میں ہفتہ کی صبح ایک 25 سالہ شخص نے پولیس کے لاک اَپ میں مبینہ طور پر خودکشی کر لی، کملا نگر تھانے میں گولو سارتھی لاک اَپ کے گیٹ سے لٹکا ملا۔

علامتی تصویر
علامتی تصویر
user

قومی آوازبیورو

مدھیہ پردیش کی راجدھانی بھوپال میں ہفتہ کی صبح ایک 25 سالہ شخص نے پولیس کے لاک اَپ میں مبینہ طور پر خودکشی کر لی، کملا نگر تھانے میں گولو سارتھی لاک اَپ کے گیٹ سے لٹکا ملا۔ اس واقعہ نے افسران کو معاملے کی عدالتی جانچ کا حکم دینے پر مجبور کر دیا ہے۔ پولیس نے بتایا کہ تھانے کے سی سی ٹی وی فوٹیج کے مطابق سارتھی نے لاک اَپ میں دیے گئے کمبل کو پھاڑ کر پھانسی لگا لی۔ سارتھی کے خلاف 2014 اور 2021 میں دو معاملے درج تھے۔

کملا نگر پولیس تھانے میں تعینات ایک پولیس افسر نے خبر رساں ایجنسی آئی اے این ایس کو بتایا کہ ملزم کے خلاف 354 سمیت تعزیرات ہند کی مختلف دفعات کے تحت معاملہ درج کیا گیا تھا۔ جمعہ کو سارتھی کو اس کی بھابھی کے ذریعہ درج کرائی گئی شکایت کی بنیاد پر پھر سے گرفتار کیا گیا تھا، جنھوں نے اس پر غلط کاری کے لیے مار پیٹ کا الزام لگایا تھا۔ ٹی ٹی نگر علاقہ کے اسسٹنٹ کمشنر امیش تیواری نے پریس کو بتایا کہ اس نے الزام لگایا کہ شوہر کی موت کے بعد وہ اس پر شادی کرنے کا دباؤ بنا رہا تھا۔ معاملے کی جانچ کے لیے فرسٹ ڈویژن جیوڈیشیل مجسٹریٹ مقرر کیا گیا ہے۔


افسر نے کہا کہ علاقہ کے ایس ڈی ایم نے قانونی کارروائی پوری کی اور لاش کو پوسٹ مارٹم کے لیے بھیج دیا ہے۔ تیواری نے کہا کہ ’’اگر کسی پولیس اہلکار کی لاپروائی سامنے آتی ہے تو اس کے خلاف ڈسپلن شکنی کی کارروائی کی جائے گی۔‘‘

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔