کرناٹک مقامی بلدیاتی انتخابات میں مخلوط حکومت کی پالیسیوں پر لگی مہر: کانگریس

نئی دہلی: کانگریس نے کرناٹک کے مقامی بلدیاتی انتخابات میں سب سے بڑی پارٹی کے طورپر ابھرنے پر خوشی ظاہر کرتے ہوئے کہا کہ ان انتخابی نتائج سے واضح ہوگیا ہے کہ وہاں کے لوگوں کو کانگریس اور جنتادل ایس کی مخلوط حکومت کی پالیسیاں پسند آرہی ہیں۔

کانگریس کے میڈیا انچارج رندیپ سنگھ سرجے والا نے پیر کوٹوئیٹ کیا، ’’کرناٹک کے لوگوں نے ایک بار پھر کانگریس پر اعتماد ظاہر کیا ہے اور شہری بلدیاتی انتخابات میں کانگریس کو نمبر ایک پارٹی بنایا ہے ۔‘‘

انھوں نے کہا کہ ان انتخابی نتائج سے یہ بھی واضح ہوگیا ہے کہ وہاں کے لوگوں نے کانگریس اور جنتادل ایس حکومت کی ترقیاتی پالیسیوں کو تسلیم کر کے بی جے پی کے جملے کو خارج کردیا ہے۔ انھوں نے اس کامیابی کے لئے کرناٹک کے کانگریس کارکنوں کو مبارک باد دی۔

واضح رہے کہ کرناٹک مقامی بلدیاتی انتخابات میں کانگریس نے 946 سیٹوں پر جیت درج کی ہے، جبکہ بی جےپی 875 سیٹوں کے ساتھ دوسرے مقام پر اور جنتادل ایس 345 سیٹوں کے ساتھ تیسرے مقام پر ہے۔