پاکستان نے رواں سال 2050 سے زائد بار جنگ بندی کی خلاف ورزی کی: وزارت خارجہ

نئی دہلی: پاکستان نے اس سال بغیر اشتعال 2050 سے زائد بار جنگ بندی کی خلاف ورزی کی جن میں 21 ہندستانی شہریوں کی موت ہوئی ہے وزارت خارجہ کے ایک ترجمان نے اتوار کو یہاں بتایا، ’’ہم نے پاکستان کی طرف سے بغیر اشتعال جنگ بندی کی خلاف ورزی، سرحد پار سے دراندازی اور ان کے ذریعہ ہندستانی شہریوں اور سرحدی چوکیوں کو نشانہ بنائے جانے پر تشویش ظاہر کی ہے‘‘

وزارت خارجہ کے ترجمان نے کہا کہ صرف اس سال کسی اشتعال کے بغیر 2050 سے زائد بار جنگ بندی کی خلاف ورزی کی گئی جن میں 21 ہندستانی شہری ہلاک ہوئے۔

انھوں نے کہا کہ ’’ ہم نے پاکستان سے اپنے سلامتی دستوں کو 2003 کے جنگ بندی معاہدے پر عمل کرنے کے لیے کہنے اور اور کنٹرول لائن اور بین الاقوامی سرحد پر امن برقرار رکھنے کے اپیل کی ہے۔ ‘‘

وزارت خارجہ کے ترجمان نے کہا کہ اس دوران ہندستانی فورسزنے ’انتہائی تحمل‘ سے کام لیا ہے اور کسی اشتعال کے بغیر کی گئی جنگ بندی کی خلاف ورزی اور سرحد پار سے دہشت گردوں کی دراندازی کی کوشش کا منہ توڑ جواب بھی دیا ہے۔

واضح رہے کہ پاکستان نے اپنے نیکیا اور جندروٹ سیکٹروں میں ہندستانی جوانوں کی طرف سے جنگ بندی کی خلاف ورزی کا الزام لگاتے ہوئے سنیچر کو ہندستان کے ڈپٹی ہائی کمشنر گورو اہلوالیہ کو طلب کیاتھا۔ اس سے ایک دن بعد وزارت خارجہ کا یہ بیان آیا ہے۔