کلبھوشن جادھو کو اپیل کا حق نہیں ملا، پاکستانی وکیل کا سپریم کورٹ میں اعتراف

اسلام آباد: پاکستان کے سپریم کورٹ میں جمعرات کو ایک اہم انکشاف ہوا ہے، جس میں یہ اعتراف کیا گیا کہ ہندوستانی شہری کلبھوشن جادھو کو تاحال فوجی عدالت کے فیصلے کے خلاف اپیل کا حق نہیں دیا گیا، حالانکہ 2019 میں بین الاقوامی عدالت انصاف (آئی سی جے) نے واضح طور پر ہدایت دی تھی کہ جادھو کو کونسلر رسائی اور اپیل کی سہولت دی جائے۔

یہ اعتراف پاکستان کے وزارت دفاع کے وکیل کی جانب سے اس وقت سامنے آیا جب عدالت میں ان پاکستانی شہریوں کے مقدمات کی سماعت ہو رہی تھی جنہیں 9 مئی 2023 کو عمران خان کی گرفتاری کے بعد ہوئے پرتشدد مظاہروں میں ملوث ہونے کے الزام میں فوجی عدالتوں نے سزا سنائی تھی۔ عدالت نے استفسار کیا کہ کیا کلبھوشن جادھو کو بھی اپیل کی وہی سہولت دی گئی تھی جو ان پاکستانی شہریوں کو دی جا رہی ہے؟ اس پر وزارت دفاع کے وکیل نے بتایا کہ جادھو کو یہ حق تاحال نہیں دیا گیا۔

وکیل نے عدالت کو مزید بتایا کہ بین الاقوامی عدالت انصاف کے فیصلے کے بعد پاکستان نے ویانا کنونشن کے آرٹیکل 36 کی خلاف ورزی کا اعتراف کیا، جس کے مطابق کسی بھی گرفتار غیر ملکی شہری کو اپنے ملک کے سفارتی نمائندوں سے رابطے، ملاقات اور قانونی معاونت حاصل کرنے کا حق حاصل ہوتا ہے۔

یاد رہے کہ کلبھوشن جادھو کو مارچ 2016 میں پاکستان کے صوبے بلوچستان سے گرفتار کیا گیا تھا۔ پاکستان کا دعویٰ ہے کہ وہ ’را‘ (ریسرچ اینڈ اینالسس ونگ) کے ایجنٹ ہیں اور بلوچ علیحدگی پسندوں کے ساتھ رابطے میں تھے۔ 2017 میں پاکستانی فوجی عدالت نے انہیں جاسوسی اور تخریب کاری کے الزامات میں سزائے موت سنائی تھی۔

دوسری جانب ہندوستان کا مؤقف ہے کہ کلبھوشن جادھو ایران میں کاروباری دورے پر گئے تھے جہاں سے انہیں غیر قانونی طور پر اغوا کر کے پاکستان لے جایا گیا۔ ہندوستان نے پاکستان پر ویانا کنونشن کی خلاف ورزی کا الزام عائد کرتے ہوئے معاملہ عالمی عدالت میں اٹھایا تھا۔

2019 میں آئی سی جے نے فیصلہ سنایا کہ پاکستان نے جادھو کو کونسلر رسائی فراہم نہ کر کے عالمی معاہدے کی خلاف ورزی کی ہے، اور پاکستان کو ہدایت دی کہ وہ جادھو کو مناسب قانونی سہولت اور اپیل کا حق فراہم کرے۔ تاہم اب تک جادھو کو یہ حق نہیں دیا گیا، جس کا اعتراف اب خود پاکستانی حکام کر رہے ہیں۔