پہلگام حملہ: مودی حکومت پر ممتا بنرجی کا سخت حملہ، کہا – ’بی جے پی عوام کو تحفظ دینے میں ناکام‘

کولکاتا: مغربی بنگال کی وزیر اعلیٰ اور ترنمول کانگریس کی سربراہ ممتا بنرجی نے جموں و کشمیر کے پہلگام میں پیش آنے والے دہشت گرد حملے کو لے کر مودی حکومت پر سخت تنقید کی ہے۔ انہوں نے الزام لگایا کہ بی جے پی قیادت والی مرکزی حکومت ملک کے عوام کو تحفظ دینے میں ناکام ہو چکی ہے اور اب اسے اقتدار سے ہٹ جانا چاہیے۔

ممتا بنرجی نے اس حملے کو مرکز کی مکمل ناکامی اور سنگین لاپروائی کا نتیجہ قرار دیتے ہوئے کہا کہ اتنے حساس مقام پر سکیورٹی فورسز کی غیر موجودگی تشویشناک ہے۔ انہوں نے کہا، ’’جب اتنا بڑا دہشت گرد حملہ ہوا تو جائے وقوعہ پر نہ کوئی سکیورٹی اہلکار تھا، نہ ہی پولیس کی موجودگی تھی۔ کیا یہ لاپروائی نہیں ہے؟‘‘

یاد رہے کہ یہ حملہ 22 اپریل کو پہلگام میں پیش آیا تھا، جس میں 26 افراد مارے گئے تھے، جن میں سے زیادہ تر سیاح تھے۔ اس اندوہناک واقعے کے بعد سکیورٹی انتظامات پر سوالات اٹھنے لگے ہیں۔

ممتا بنرجی مغربی بنگال اسمبلی میں 'آپریشن سندور' کے دوران سکیورٹی فورسز کی بہادری کی تعریف میں ایک قرارداد کے دوران خطاب کر رہی تھیں۔ انہوں نے فوجی کارروائیوں کی تعریف کرتے ہوئے کہا، ’’ہم اپنے بہادر جوانوں کو سلام پیش کرتے ہیں لیکن بدقسمتی سے ان کی قربانیوں کو بی جے پی سیاسی فائدے کے لیے استعمال کرتی ہے۔‘‘

وزیر اعلیٰ نے بی جے پی پر یہ الزام بھی عائد کیا کہ وہ انتخابات کے دوران فوجی کارروائیوں اور سکیورٹی اہلکاروں کی قربانیوں کو اپنے حق میں پروپیگنڈا کے طور پر پیش کرتی ہے۔ انہوں نے کہا، ’’ہم فوج کا احترام کرتے ہیں لیکن بی جے پی ان کی بہادری کا استعمال سیاسی فائدے کے لیے کرتی ہے، جو کہ افسوسناک ہے۔‘‘

ممتا بنرجی نے وزیراعظم نریندر مودی پر بھی براہ راست حملہ کرتے ہوئے کہا کہ وہ صرف اپنی تشہیر میں مصروف ہیں اور عوام کے حقیقی مسائل سے ان کا کوئی لینا دینا نہیں ہے۔ انہوں نے کہا، ’’وزیراعظم صرف کیمرے کے سامنے نظر آتے ہیں، ان کے لیے ملک کے لوگ اور ان کی حفاظت ثانوی حیثیت رکھتی ہے۔‘‘

انہوں نے مزید کہا کہ دہشت گردی کا کوئی مذہب، نسل یا فرقہ نہیں ہوتا اور جو بھی پہلگام حملے میں ملوث ہیں، انہیں انصاف کے کٹہرے میں لایا جانا چاہیے۔ ساتھ ہی انہوں نے پی او کے (پاکستان مقبوضہ کشمیر) پر بھی بات کرتے ہوئے کہا کہ فوجی کارروائی کے دوران ہندوستان کے پاس موقع تھا کہ وہ پاکستان مقبوضہ کشمیر کو اپنے کنٹرول میں لے لیکن حکومت نے وہ قدم نہیں اٹھایا۔