سماجوادی پارٹی کی آندھی میں کچرے کی طرح اڑ جائے گی اویسی کی پارٹی: ابو عاصم اعظمی

ابو عاصم اعظمی کا کہنا ہے کہ بی جے پی یو پی اسمبلی انتخاب ہارنے والی ہے، اس لیے وہ چاہتی ہے کہ کوئی اویسی، کوئی آزاد یا بی ایس پی مسلمانوں کو کھڑا کرے تاکہ ووٹ تقسیم ہو جائیں، لیکن عوام عقلمند ہے۔

ابو عاصم اعظمی تصویر ٹوئٹر@abuasimazmi
ابو عاصم اعظمی تصویر ٹوئٹر@abuasimazmi
user

تنویر

اتر پردیش میں آئندہ سال اسمبلی انتخابات ہونے والے ہیں اور اس کو لے کر سبھی چھوٹی بڑی پارٹیوں نے سرگرمیاں تیز کر دی ہیں۔ اس بار اتر پردیش میں اسدالدین اویسی کی پارٹی اے آئی ایم آئی ایم بھی اپنی قسمت آزمائی کرنے والی ہے اور کچھ چھوٹی پارٹیوں کے ساتھ اتحاد بھی قائم کر چکی ہے۔ اس درمیان سماجوادی پارٹی کے مشہور و معروف لیڈر ابو عاصم اعظمی کا ایک بیان سامنے آیا ہے جس میں انھوں نے کہا ہے کہ اویسی کی پارٹی اسمبلی الیکشن میں ٹکنے والی نہیں ہے، وہ سماجوادی پارٹی کی آندھی میں کھر-پتوار (کچرے) کی طرح اڑ جائے گی۔

ابو عاصم اعظمی نے اپنے ایک بیان میں کہا ہے کہ بی جے پی اتر پردیش اسمبلی انتخاب میں ہارنے والی ہے، اس لیے وہ چاہتی ہے کہ کوئی اویسی، کوئی آزاد یا بی ایس پی مسلمانوں کو کھڑا کرے اور ان کے ووٹ تقسیم ہو جائیں، لیکن عوام عقلمند ہے۔ بی جے پی کے منصوبے اس بار کامیاب نہیں ہو پائیں گے۔


مہاراشٹر سماجوادی پارٹی کے صدر ابو عاصم اعظمی نے مذکورہ بیان پارٹی کی میٹنگ کے بعد دیا ہے۔ انھوں نے نامہ نگاروں سے بات چیت کے دوران یہ بھی کہا کہ ’’اکھلیش یادو نوجوان لیڈر ہیں اور اگر وہ وزیر اعلیٰ کی شکل میں ریاست کی قیادت کرتے ہیں تو اتر پردیش کی نہ صرف ترقی ہوگی بلکہ عالمی سطح کی ترقی ہوگی۔‘‘

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔