کسانوں کی حمایت میں این ایس یوآئی کی ’سائیکل ریلی‘ دہلی روانہ

راجستھان میں نیشنل اسٹوڈنٹس یونین آف انڈیا(این ایس یوآئی) کے سینکڑوں کارکنان نے سائیکل ریلی کی شکل میں کسانوں کی حمایت میں آج دوپہر جئے پور سے دہلی کوچ کیا۔ کسانوں کی آواز مضبوط کرنے کے لیے این ایس یوآئی کارکنان کی سائیکل ریلی ’امرجوان جیوتی‘ سے دہلی کے لئے روانہ ہوئی۔ این ایس یو آئی صدر نیرج کندن کی صدارت میں نکلی اس سائیکل یاترا میں مختلف مقامات سے تعلق رکھنے والے طلبا کی بڑی تعداد شامل ہے اور امکان ظاہر کیا جا رہا ہے کہ منگل کے روز یاترا شاہجہاں پور پہنچے گی۔

این ایس یو آئی کے قومی سکریٹری لوکیش چگھ نے اپنے ایک بیان میں کہا ہے کہ سردی اور بارش کے اس موسم میں کسان بھائی اب بھی دہلی بارڈرس پر کھلے آسمان کے نیچے مظاہرہ کر رہے ہیں، اور اس سے سبھی کے دل پسیج گئے ہیں، لیکن مرکزی حکومت کسانوں کے مسائل کو نظرانداز کر رہی ہے۔ انھوں نے مزید کہا کہ ’’ہمارے وزیر اعظم کو سیاسی ریلی سے خطاب کرنے کا وقت ہے، لیکن ہمارے اَن داتا کے سنگین مسائل کی طرف ان کا کوئی دھیان نہیں ہے۔‘‘

این ایس یو آئی قومی صدر نیرج کندن نے سائیکل یاترا نکالے جانے سے قبل کہا کہ یہ مارچ کسانوں کے حقوق کے لیے ہے۔ انھوں نے مزید کہا کہ ’’ہم ہمیشہ کسانوں کی حمایت میں کھڑے ہیں اور ہمارا مکمل تعاون ان کے ساتھ ہے۔ زرعی قوانین کے خلاف کسانوں کی تحریک جائز ہے اور ان کا مطالبہ ضرور پورا ہونا چاہیے۔‘‘ نیرج کندن نے یہ بھی کہا کہ ’’ہماری سائیکل یاترا حکومت کے لیے صرف پیغام نہیں ہے، بلکہ دہلی فتح کے لیے بڑھایا گیا قدم ہے۔ پولس نے جو بربریت کسانوں کے ساتھ کی ہے، وہ بھی مناسب نہیں ہے۔ واٹر کینن اور آنسو گیس کا استعمال کرنا کسی بھی طرح قابل قبول نہیں ہے۔‘‘

ریاستی کانگریس صدر اور وزیر تعلیم گووند سنگھ ڈوٹاسرا نے ہری جھنڈی دکھا کر ریلی کو روانہ کیا۔ یہ ریلی دہلی کے راستے میں بہراڑ میں رکے گی اور اس کے بعد پھر دہلی کے لیے روانہ ہوجائے گی۔ بتایا جارہا ہے کہ یہ ریلی چھ جنوری کو دہلی پہنچ کر کسان تحریک میں شامل ہوگی۔ اس موقع پر ڈوٹاسرا نے کہا کہ آج چالیس روز سے کسان تحریک کررہے ہیں لیکن مرکزی حکومت ان کی بات نہیں سن رہی ہے۔ اس دوران چالیس سے زائد کسان خودکشی کرچکے ہیں۔ ڈوٹاسرا نے مرکزی حکومت پر الزام لگاتے ہوئے کہا کہ جس کسان کے ووٹ سے اقتدار میں آئی حکومت آج ووٹ کی نہیں سن رہی ہے وہ ان داتا کی نہ ہوکر پیسے داتا کی ہوگئی ہے۔ اس موقع پر وزیر ریونیو ہریش چودھری، وزیراعلیٰ تعلیم بھنور سنگھ بھاٹی، ٹرانسپورٹ منسٹر پرتاپ سنگھ کھاچریاواس اور وزیرکھیل اشوک چندنا بھی موجود تھے۔