نمیشا پریا کی سزائے موت پر مداخلت کی عرضی، سپریم کورٹ نے سماعت جنوری 2026 تک کی ملتوی

نئی دہلی: یمن میں سزائے موت پانے والی ہندوستانی نرس نمیشا پریا کے معاملے میں جمعرات کو سپریم کورٹ میں ہونے والی سماعت ملتوی کر دی گئی۔ عدالت نے واضح کیا کہ اب اس معاملے کی اگلی سماعت جنوری 2026 میں ہوگی۔

عدالت میں پیش ہونے والے اٹارنی جنرل آر وینکٹارمنی نے بنچ کو بتایا کہ حال ہی میں اس کیس میں ایک نیا ثالث (مِڈی ایٹر) سامنے آیا ہے، جو دونوں فریقین کے درمیان بات چیت کے عمل کو آگے بڑھا سکتا ہے۔ انہوں نے کہا کہ ابھی تک کوئی منفی پیش رفت سامنے نہیں آئی ہے، اس لیے عدالت کو مزید وقت دینا مناسب ہوگا۔

عدالت نے اس بات سے اتفاق کرتے ہوئے کہا کہ اگر آئندہ چند ماہ میں کوئی نیا واقعہ یا پیش رفت سامنے آئے، تو متاثرہ فریق عدالت سے جلد سماعت کی درخواست کر سکتا ہے۔

یاد رہے کہ نمیشا پریا کی رہائی کے لیے سیو نمیشا پریا انٹرنیشنل ایکشن کونسل نے سپریم کورٹ میں ایک عرضی دائر کی تھی۔ عرضی میں مطالبہ کیا گیا ہے کہ عدالت مرکز کو ہدایت دے کہ وہ سفارتی ذرائع کے ذریعے یمن کی حکومت سے رابطہ کرے اور نمیشا کی سزائے موت پر فوری طور پر عمل درآمد روکنے کی کوشش کرے۔

یاد رہے کہ نرس نمیشا پریا کو یمن کی عدالت نے 2017 میں ایک شہری کے قتل کے الزام میں سزائے موت سنائی تھی۔ انہیں 16 جولائی 2025 کو پھانسی دی جانی تھی، تاہم بعد میں ان کی سزا عارضی طور پر معطل کر دی گئی۔ اس واقعے کے بعد مختلف انسانی حقوق تنظیموں اور سماجی کارکنوں نے ہندوستانی حکومت سے اپیل کی تھی کہ وہ سفارتی اور قانونی سطح پر اقدامات کرتے ہوئے نمیشا کی جان بچانے یا ان کی سزا کم کرانے کے لیے بھرپور کوشش کرے۔

سیو نمیشا پریا انٹرنیشنل ایکشن کونسل نے وزارتِ خارجہ سے درخواست کی تھی کہ اسے یمن جانے کی اجازت دی جائے تاکہ مقامی قوانین کے مطابق متاثرہ خاندان سے معافی (دیت) حاصل کی جا سکے۔ تاہم وزارتِ خارجہ نے اس درخواست کو مسترد کر دیا تھا۔

وزارت نے اپنے فیصلے کی وضاحت کرتے ہوئے کہا تھا کہ یمن اس وقت جنگ زدہ اور غیر مستحکم ملک ہے، جہاں شہریوں کی سلامتی کے لیے حالات انتہائی خطرناک ہیں۔ ایسے میں کسی بھی وفد کو وہاں بھیجنا ممکن نہیں۔ نمیشا پریا کا معاملہ نہ صرف انسانی ہمدردی بلکہ سفارتی تعلقات کے نکتہ نظر سے بھی حساس قرار دیا جا رہا ہے۔ ان کے حامیوں کا کہنا ہے کہ اگر ہندوستان حکومت سنجیدہ کوشش کرے تو یمن کے قوانین کے تحت قصاص یا دیت کے راستے ان کی جان بچائی جا سکتی ہے۔