قومی سطح کے کھلاڑیوں کے لیے نئی پالیسی بنائی جائے گی: سوکھو

ہماچل پردیش کے وزیر اعلیٰ ٹھاکر سکھویندر سنگھ سوکھو نے پیر کو یہاں کہا کہ ریاستی حکومت جلد ہی قومی سطح کے کھلاڑیوں کے لیے نئی پالیسی لائے گی۔وزیر اعلیٰ سوکھو نے یہ بات ریاست کے کھلاڑیوں کی ٹیم سے خطاب کرتے ہوئے کہی جو اتراکھنڈ میں منعقد ہونے والے 38 ویں قومی کھیلوں میں حصہ لینے جا رہے ہیں۔ ریاست کی 200 رکنی ٹیم 28 جنوری سے 14 فروری تک منعقد ہونے والے قومی کھیلوں میں حصہ لے گی۔

کھلاڑیوں کو مبارکباد دیتے ہوئے وزیر اعلیٰ نے کہا کہ ریاستی حکومت نے کھیلوں اور کھلاڑیوں کو فروغ دینے کے لیے بہت سے اقدامات کیے ہیں۔ ضلعی سطح پر کھیلوں کا بنیادی ڈھانچہ تیار کیا جا رہا ہے۔ اس کے علاوہ بین الاقوامی کھیلوں کے مقابلوں میں نمایاں کارکردگی دکھانے والوں کی انعامی رقم میں نمایاں اضافہ کیا گیا ہے۔

سوکھو نے کہا کہ اولمپکس، سرمائی اولمپکس اور پیرا اولمپکس میں گولڈ میڈل جیتنے والوں کی انعامی رقم 3 کروڑ سے بڑھا کر 5 کروڑ روپے کر دی گئی ہے۔ اسی طرح چاندی کا تمغہ جیتنے والوں کے لیے رقم 2 کروڑ سے بڑھا کر 3 کروڑ روپے اور کانسہ کا تمغہ جیتنے والوں کے لیے رقم 1 کروڑ سے بڑھا کر 2 کروڑ روپے کر دی گئی ہے۔

انہوں نے کہا کہ ایشین گیمز اور ایشین پیرا گیمز میں گولڈ میڈل جیتنے والوں کی انعامی رقم 50 لاکھ روپے سے بڑھا کر 4 کروڑ روپے کر دی گئی ہے۔ چاندی کا تمغہ جیتنے والوں کو اب 30 لاکھ روپے کی بجائے 2.5 کروڑ روپے اور کانسہ کا تمغہ جیتنے والوں کو 20 لاکھ روپے کی بجائے 1.5 کروڑ روپے ملیں گے، جبکہ کامن ویلتھ گیمز میں گولڈ میڈل جیتنے والوں کو 50 لاکھ روپے کی بجائے 3 کروڑ روپے ملیں گے۔ چاندی کا میڈل جیتنے والوں کو 30 لاکھ روپے کی بجائے 2 کروڑ روپے اور کانسہ کا تمغہ جیتنے والوں کو 20 لاکھ روپے کی بجائے ایک کروڑ روپے کا انعام دیا جا رہا ہے۔

وزیر اعلیٰ نے کھلاڑیوں کی فلاح و بہبود کے لیے اپنے عزم پر زور دیتے ہوئے کہا کہ وہ بھی کھیلوں سے وابستہ رہے ہیں اور کھلاڑیوں کی ضروریات کو نظر انداز نہیں کیا جا سکتا۔انہوں نے کہا کہ اس سے قبل انڈر 17 اور انڈر 19 کھلاڑیوں کو ریاستی سطح کے مقابلوں کے لیے 150 روپے اور قومی مقابلوں کے لیے 250 روپے کی ڈائیٹ منی ملتی تھی۔ موجودہ ریاستی حکومت نے اس رقم کو بڑھا کر بالترتیب 400 اور 500 روپے کر دیا ہے۔ اسی طرح انڈر 14 کھلاڑیوں کی ڈائٹ منی ریاستی سطح کے مقابلوں کے لیے 120 روپے سے بڑھا کر 250 روپے اور قومی سطح کے مقابلوں کے لیے 250 روپے سے بڑھا کر 400 روپے کر دی گئی ہے۔ اسپورٹس ہاسٹلز میں رہنے والے کھلاڑیوں کی ڈائٹ منی بھی 150 روپے سے بڑھا کر 400 روپے کر دی گئی ہے۔ اس کے علاوہ ریاست سے باہر منعقد ہونے والے مقابلوں میں حصہ لینے والے کھلاڑیوں کو اب 200 کلومیٹر تک کے لیے اے سی تھری ٹائر ریل کا کرایہ اور 200 کلومیٹر سے زیادہ کی دوری کے لیے اکانومی کلاس کا ہوائی کرایہ دیا جائے گا۔

اس موقع پر ڈپٹی چیف وہپ کیول سنگھ پٹھانیا، ایم ایل اے ہریش جنارتھا اور بابا ہردیپ سنگھ، چیف منسٹر کے پرنسپل ایڈوائزر (میڈیا) نریش چوہان اور مختلف کھیلوں کی تنظیموں کے نمائندے بھی موجود تھے۔