نیٹ معاملہ: احتجاج میں شریک طلبہ کے خلاف درج مقدمات واپس لے گی تمل ناڈو حکومت

تمل ناڈو حکومت نیٹ پیپر لیک کے خلاف احتجاج کرنے والے طلبہ کے خلاف درج تمام مقدمات واپس لے گی۔ یہ فیصلہ وزیر اعلیٰ سی جوزف وجے کی ہدایت پر لیا گیا ہے۔ اسکولی تعلیم کے وزیر راج موہن نے اتوار (2 اگست) کو یہ اعلان کیا۔ انہوں نے سوشل میڈیا پلیٹ فارم ’ایکس‘ پر لکھا کہ ’’حکومت نے نیٹ مخالف مظاہروں کے سلسلے میں طلبہ کے خلاف درج تمام مقدمات واپس لینے کا فیصلہ کیا ہے۔ مقدمات واپس لینے کے عمل اور اس فیصلے کے دائرے میں آنے والے کیسز کے بارے میں جلد ہی مزید معلومات فراہم کی جائیں گی۔‘‘

واضح رہے کہ یہ اعلان ملک کے کئی حصوں میں نیٹ کو لے کر بڑے پیمانے پر ہوئے احتجاجی مظاہروں کے کچھ دنوں بعد کیا گیا ہے، جس میں طلبہ اور نوجوان تنظیموں نے امتحانی نظام پر تشویش کا اظہار کیا اور تبدیلی کا مطالبہ کیا۔ تمل ناڈو میں بھی ریلیوں، اچانک احتجاجی مظاہروں (فلیش پروٹیسٹ) اور دیگر طرح کی تحریکوں سمیت کئی مظاہرے ہوئے۔ ریاست میں کئی جگہوں پر مختلف طلبہ تنظیموں اور سیاسی گروہوں نے مظاہرے منظم کیے۔ چنئی میں، مظاہرین نے کمیونسٹ پارٹی آف انڈیا (سی پی آئی) کے ریاستی ہیڈ کوارٹر ’بالن الم‘ پر مسلسل احتجاجی مظاہرہ کیا۔

ریاست کے کچھ حصوں سے اچانک احتجاجی مظاہروں کی بھی خبریں آئی تھیں۔ کچھ مقامات پر مظاہرین کی جانب سے سڑک بلاک کیے جانے کے بعد پولیس کو مداخلت کرنی پڑی۔ ایسے مظاہروں کے دوران کئی طلبہ کو حراست میں لیا گیا، جبکہ بعض احتجاجی واقعات کے سلسلے میں مقدمات بھی درج کیے گئے۔ ریاستی حکومت کے اس نئے اعلان سے نیٹ مخالف مظاہروں سے متعلق مجرمانہ کارروائیوں کو واپس لینے کا راستہ صاف ہونے کی امید ہے۔ باضابطہ طور پر مقدمات واپس لینے کا عمل شروع کرنے سے پہلے افسران کی جانب سے پورے تمل ناڈو کے پولیس اسٹیشنوں میں درج کیسز کی جانچ کیے جانے کا امکان ہے۔