’نریندر مودی نے ووٹ چوری کر جنگل راج نافذ کر دیا ہے‘، وزیر گنج اسمبلی حلقہ میں راہل گاندھی کا خطاب

’’نریندر مودی نے ووٹ چوری کر جنگل راج نافذ کر دیا ہے۔ بی جے پی کے لوگ مہاراشٹر، ہریانہ، چھتیس گڑھ کی حکومت چوری کرنے کے بعد اب بہار کی حکومت چوری کرنا چاہتے ہیں۔‘‘ بی جے پی پر یہ سنگین الزام آج راہل گاندھی نے بہار کے وزیر گنج اسمبلی حلقہ میں ایک انتخابی جلسہ سے خطاب کرتے ہوئے دیا۔ انھوں نے نہ صرف بی جے پی کو بہار کے خراب حالات کے لیے ذمہ دار ٹھہرایا، بلکہ ریاستی وزیر اعلیٰ نتیش کمار کا کنٹرول بھی بی جے پی کے ہاتھوں میں ہونے کا دعویٰ کیا۔

راہل گاندھی نے انتخابی جلسہ میں موجود لوگوں کی زبردست بھیڑ سے خطاب کرتے ہوئے مہاگٹھ بندھن کو بھاری اکثریت سے کامیاب بنانے کی اپیل کی اور وعدہ کیا کہ ریاست کی ترقی کے لیے ہر ضروری قدم اٹھایا جائے گا۔ انھوں بہار اسمبلی انتخاب میں کامیابی کا عزم ظاہر کرتے ہوئے کہا کہ ’’بہار میں مہاگٹھن بندھن کی حکومت بننے جا رہی ہے۔ مہاگٹھ بندھن کی یہ حکومت ہر طبقہ، ہر ذات اور ہر مذہب کی حکومت ہوگی۔‘‘ وہ مزید کہتے ہیں کہ ’’اس حکومت میں خاتون، کسان، مزدور، نوجوان سمیت پورے بہار کی آواز شامل ہوگی۔‘‘

ووٹ کی اہمیت ظاہر کرتے ہوئے راہل گاندھی لوگوں سے اپنے اپنے حق رائے دہی کا استعمال کرنے کی گزارش کی۔ انھوں نے کہا کہ ’’بابا صاحب امبیڈکر جی نے ملک کو آئین دیا، جس میں ہر شخص کو ایک ووٹ کا حق دیا گیا۔ لیکن نریندر مودی اور امت شاہ الیکشن کمیشن کے ساتھ مل کر ’ووٹ چوری‘ کر رہے ہیں، جو کہ آئین پر حملہ ہے۔‘‘ ساتھ ہی وہ کہتے ہیں کہ ’’یہ بہار میں بھی ووٹ چوری کرنے کی کوشش کریں گے، لیکن ہمیں انھیں ایسا کرنے سے روکنا ہے۔ ہمیں مضبوطی کے ساتھ ڈٹے رہنا ہے اور آئین کی حفاظت کرنی ہے۔‘‘

اس سے قبل راہل گاندھی نے کٹمبا اسمبلی حلقہ میں بھی انتخابی جلسہ کو خطاب کیا۔ کٹمبا میں راہل گاندھی نے کہا کہ ’’بہار کے لوگ پورے ملک میں مزدوری کر رہے ہیں۔ ملک کے الگ الگ حصوں میں بہار کے لوگ بڑی بڑی عمارتیں، سڑکیں، ٹنل، فیکٹریاں بناتے ہیں۔ یعنی سچائی یہ ہے کہ نتیش کمار نے یہاں سے روزگار مٹا کر بہار کے لوگوں کو ملک کا مزدور بنا دیا ہے۔‘‘ وہ یہ بھی کہتے ہیں کہ ’’نتیش جی کا ریموٹ مودی-شاہ کے پاس ہے۔ جس طرح ریموٹ سے ٹی وی کا چینل بدلا جاتا ہے، ویسے ہی مودی-شاہ نتیش جی کا چینل بدلتے ہیں۔‘‘

اس انتخابی جلسہ میں راہل گاندھی نے نچلی ذات کو منصوبہ بند طریقے سے پسماندہ بنانے کا الزام بھی برسراقتدار طبقہ پر عائد کیا۔ انھوں نے کہا کہ ’’اگر آپ ملک میں 500 سب سے بڑی کمپنیوں کی لسٹ نکالیں گے، تو آپ کو اس میں پسماندہ، انتہائی پسماندہ، دلت، مہادلت، قبائلی طبقہ کے لوگ نہیں ملیں گے۔‘‘ انھوں نے مزید کہا کہ ’’ان کمپنیوں میں کام کرنے والے لوگ 10 فیصد کی آبادی میں سے آتے ہیں۔ عدلیہ ہو یا بیوروکریسی، ہر جگہ ان کو ہی جگہ ملتی ہے۔ اگر ہم ملک کے 90 فیصد لوگوں کو ملک کی ترقی میں شامل نہیں کریں گے تو ایک ایسا ہندوستان بنے گا جہاں پوری دولت 3-2 لوگوں کے ہاتھوں میں ہوگی۔‘‘