کرناٹک کے سابق ڈی جی پی اوم پرکاش کی پراسرار موت، کئی چوٹوں کے نشانات، بیوی پر قتل کا شبہ

بنگلورو: کرناٹک کے سابق پولیس ڈی جی پی اوم پرکاش کی پراسرار موت نے ساری ریاست کو ہلا کر رکھ دیا ہے۔ ان کی لاش ایچ ایس آر لے آؤٹ کے ایک تین منزلہ گھر کے گراؤنڈ فلور پر ملی۔ پولیس کا کہنا ہے کہ اوم پرکاش کو چاقو سے مارا گیا تھا، جس کے بعد ان کے جسم پر کئی گہرے زخموں کے نشان پائے گئے۔ پولیس نے فوراً تحقیقات کا آغاز کیا اور اس حوالے سے ان کی بیوی پلوی اور بیٹی سے بھی پوچھ گچھ شروع کر دی ہے۔

پولیس کے مطابق، اوم پرکاش نے کچھ وقت پہلے اپنی جان کو خطرہ ہونے کی بات کہی تھی، جس کی وجہ سے ابتدائی تحقیقات میں یہ شبہ ظاہر ہو رہا ہے کہ ان کی موت میں کسی قریبی رشتہ دار کا ہاتھ ہو سکتا ہے۔ ان کی بیوی پلوی نے سب سے پہلے پولیس کو اس واقعہ کے بارے میں اطلاع دی، جس کے بعد پولیس موقع پر پہنچی اور تحقیقات شروع کی۔ سینئر پولیس افسران بھی جائے وقوعہ پر پہنچے ہیں اور پوسٹ مارٹم کے لیے لاش کو سینٹ جان ہسپتال بھیج دیا گیا ہے۔

اوم پرکاش 1981 بیچ کے آئی پی ایس افسر تھے اور 2015 سے 2017 تک کرناٹک کے پولیس ڈی جی پی رہے تھے۔ ان کی خدمات کی فہرست میں کرناٹک ہوم گارڈز اور فائر بریگیڈ کے ڈی جی، کرناٹک وجیلنس کے ایس پی، لوک آیکٹ میں خدمات اور دیگر اہم عہدوں پر کام شامل ہے۔ انہوں نے 1993 کے بھٹکل فسادات کے دوران اہم کردار ادا کیا تھا۔ ان کی موت کی تفتیش جاری ہے اور پولیس مختلف زاویوں سے معمہ حل کرنے کی کوشش کر رہی ہے۔