ممبئی : یومِ عاشورہ کا روایتی جلوس پر امن طورپر اختتام پذیر ہوا

ممبئی میں یوم عاشورہ کاروایتی اور تاریخی جلوس بڑے تزک و اہتمام سے برآمد ہوا۔ جنوبی ممبئی میں واقع زینبیہ امام باڑہ سے جلوسِ یوم عاشورہ برآمد ہوا اور اپنے طئے شدہ راستے بھنڈی بازار، محمد علی روڑ ،بائیکلہ ہونڈا سرکل اور مجگاوں سے ہوتا ہوا رحمت آباد قبرستان پر اختتام پذیر ہوا۔ اس موقع پر جلوسِ میں لاکھوں کی تعداد میں عزادارانِ حسین نے شرکت کی اور امامِ اعلی مقام اور اہل بیت کی شہادت کا غم منایا اور ماتم کیا۔

یا حسین یاحسین کی صداؤں سے پورا علاقہ گونج اٹھا۔ عَلم پرچم،شبیہات ، ماتم،نوحے و مرثیہ خوانی کی صداؤں کے درمیان جلوس رواں دواں ہوا۔ اس ماتمی جلوس میں بزرگ، بچے مردوخواتین اور نوجوان کے علاوہ ہر عمر کے افراد نے شرکت کی، تعزیہ،  نوحہ خوانی علم برداری اور ماتم و آہ و بکاہ سے شہادتِ امام حسین اور اہل بیت کو یاد کیا۔

اس موقع پر ممبئی پولیس نے جلوس کیلئے خاص حفاظتی انتظامات کئے تھے۔  پولیس اہلکار کسی بھی قسم کے ناخوشگوار واقع سے نپٹنے کیلئے کمربستہ تھے۔ سوشل میڈیا پر بھی پولیس نے گہری نگاہ بنائے رکھی تھی۔

یاد رہے کہ جنوبی ممبئی کے علاوہ ممبئی کے مختلف مضافاتی علاقوں سے بھی عاشورہ اور تعزیہ داری کا جلوس برآمد ہوا۔ اس میں دھاراوی, سائن, جوگیشوری, اندھیری, ملاڈ مالونی سمیت دیگر علاقوں میں بھی تعزیہ داری کا جلوس نکالا گیا۔ تعزیہ داری کے جلوس کے پیشِ نظر بھی پولیس نے کئی سڑکوں کو عارضی طور پر مقفل کر دیا تھا اور کئی سڑکوں کو تو پوری طرح سے دوسری جانب منتقل کر دیا گیا تھا۔ ٹریفک محکمہ کو ممبئی پولیس کمشنر وویک پھنسلکر نے ضروری ہدایات جاری کی تھیں۔

جنوبی ممبئی کے زینبیہ امام باڑہ سے شام کے وقت روایتی جلوس برآمد ہوا اس میں شہر ممبئی کے علاوہ مضافاتی علاقوں کے عزاداران  نے بھی شرکت کی اور شہادتِ امام حسین و اہل بیت پر ماتم کیا۔ جنوبی ممبئی سے برآمد ہونے والا جلوس آگے بڑھ کر جمِ غفیر کی شکل اختیارکرگیا تھا۔ جلوس عزا داری میں قلع قمع زنجیروں کا ماتمی جلوس میں جانثاراں حسین ؓ کا اژدہام تھا ہر طرف شاہراہوں پر سبلیں حسینیت میں لنگرِ حسین اور نیاز تقسیم کی جارہی تھی۔

یوم عاشورہ کے پس منظر میں صرف جنوبی ممبئی ہی نہیں بلکہ مضافاتی علاقوں میں بھی تعزیہ داری کا جلوس نکالا گیا تھا جس کے بعد شہر میں جنوبی ممبئی کی جانب جے جے اور مجلگاؤں کی جانب جانے والی سڑکوں کو دیگر جانب منتقل کیا گیا تھا اور جلوس کے لئے راستہ پوری طرح سے بند کر دیا گیا تھا تاکہ جلوس اور ٹریفک نظام میں کسی بھی قسم کی کوئی پریشانی نہ ہو اور ٹریفک نظام بھی بحال رہے۔ یوم عاشورہ پر جلوس اعزاداری اور تعزیہ داری روایتی شاہراہوں اور گزرگاہوں سے گزرتا ہوا پرامن طور پر اختتام پذیر ہوا۔

ممبئی پولیس کمشنر وویک پھنسلکر نے جلوس عزا اور تعزیہ داری کے پرامن اختتام پر مسلمانوں کے تعاون کا شکریہ ادا کیا اور کہا کہ پولیس اور جانثاراں حسین ؓ کے تعاون کی وجہ سے جلوس پرامن طور سے اختتام کو پہنچا ہے۔