موربی پل حادثہ: اوریوا گروپ کے منیجنگ ڈائریکٹر جئے سکھ پٹیل نے عدالت میں کی خودسپردگی

گجرات میں پیش آئے موربی پل حادثہ معاملے میں ملزم اوریوا گروپ کے منیجنگ ڈائریکٹر جئے سکھ پٹیل نے منگل کے روز موربی واقع چیف جیوڈیشیل مجسٹریٹ کورٹ میں خودسپردگی کر دی۔ سی جے ایم کورٹ نے پٹیل کے خلاف وارنٹ جاری کیا تھا جس کے پیش نظر انھوں نے عدالت میں خود سپردگی کا فیصلہ کیا۔ واضح رہے کہ گزشتہ سال موربی میں مچھو ندی پر بنا پل گرنے سے تقریباً 135 لوگوں کی موت ہو گئی تھی۔ اس معاملے میں گجرات پولیس نے 9 افراد کو گرفتار کیا تھا جس میں اوریوا گروپ کے چار ملازمین بھی شامل تھے۔ ان میں 2 کمپنی کے منیجر ہیں اور 2 ٹکٹ کلرک۔

واضح رہے کہ اوریوا گروپ کے منیجنگ ڈائریکٹر جئے سکھ پٹیل کا نام ایف آئی آر میں بطور ملزم درج ہے۔ انھوں نے گزشتہ 20 جنوری کو موربی کے سیشن کورٹ میں عرضی داخل کر پیشگی ضمانت کا مطالبہ کیا تھا، لیکن عدالت نے اسے خارج کر دیا تھا۔

بہرحال، گجرات ہائی کورٹ بھی اس معاملے پر از خود نوٹس لے کر سماعت کر رہا ہے۔ ہائی کورٹ نے گزشتہ ماہ موربی سسپنشن برج کا رکھ رکھاؤ اور مینجمنٹ کرنے والی کمپنی اجنتا مینوفیکچرنگ لمیٹڈ (اوریوا گروپ) کو نوٹس جاری کیا تھا۔ اس کارروائی میں کمپنی کو مدعا علیہ بنانے کا مطالبہ کیا گیا تھا۔ عرضی دہندہ نے مطالبہ کیا ہے کہ کمپنی کو حادثے سے ہوئے نقصان کی ادائیگی کے لیے ذمہ دار بنایا جائے۔