مودی حکومت نے بی ایس این ایل اور بھارت براڈبینڈ نیٹورک لمیٹڈ کے انضمام کو دی منظوری

مودی کابینہ کی میٹنگ کے بعد مرکزی وزیر برائے ٹیلی مواصلات اشونی ویشنو نے کہا کہ بی ایس این ایل کے لیے 1.64 لاکھ کروڑ روپے کا پیکیج منظور کیا گیا ہے۔

بی ایس این ایل، تصویر آئی اے این ایس
بی ایس این ایل، تصویر آئی اے این ایس
user

قومی آوازبیورو

بی ایس این ایل کی خستہ حالت کو دیکھتے ہوئے مودی کابینہ نے آج اس کے لیے ریوائیول پیکیج کو منظوری دے دی۔ کابینہ کی میٹنگ کے بعد مرکزی وزیر برائے ٹیلی مواصلات اشونی ویشنو نے کہا کہ بی ایس این ایل کے لیے 1.64 لاکھ کروڑ روپے کا پیکیج منظور کیا گیا ہے۔ ساتھ ہی مرکزی وزیر نے کہا کہ کابینہ نے بی ایس این ایل اور بھارت براڈبینڈ نیٹورک لمیٹڈ کے انضمام کو بھی منظوری دے دی گئی ہے۔

اشونی ویشنو نے مرکزی کابینہ کے ذریعہ لیے گئے فیصلے کے بارے میں صحافیوں کو کچھ اہم جانکاریاں دیں۔ انھوں نے بتایا کہ حکومت بی ایس این ایل کو 4جی خدمات کی پیشکش کرنے کے لیے اسپیکٹرم الاٹ کرے گی۔ مرکزی وزیر نے مزید کہا کہ ایک دیگر فیصلے کے تحت گاؤں میں کنکٹویٹی کے لیے آج 26316 کروڑ کے پیکیج کو کابینہ نے منظوری دی۔ جن گاؤں میں 2جی ہے انھیں 4 جی سروس ملے، اس کے لیے منظوری دی گئی۔ اس سے 25 ہزار گاؤں کو فائدہ ملے گا۔ اس معاملے میں بارڈر ایریا کے لیے بھی حکم دیا گیا ہے۔


مرکزی وزیر برائے ٹیلی مواصلات اشونی ویشنو کا کہنا ہے کہ بارڈر ایریا میں مشرقی لداخ بھی شامل ہوگا جہاں 4جی لایا جا سکتا ہے۔ وزارت دفاع، وزارت داخلہ اور وزارت برائے کمیونکیشن بتائیں گے کہ کس طرح بارڈر ایریا میں 4 جی نیٹورک لایا جا سکتا ہے۔ ویشنو نے کہا کہ وزیر اعظم نریندر مودی سماج کے آخری سرے کے شخص پر بھی توجہ دیتے ہیں اور تازہ فیصلہ اس کی مثال ہے۔

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔