غازی آباد کے کمرشیل پلازہ میں لگی خوفناک آگ، بینکوئٹ ہال میں چل رہی تھی پارٹی

دہلی سے ملحق اتر پردیش کے غازی آباد واقع اندراپورم تھانہ علاقہ میں پیر کی دوپہر ایک کمرشیل پلازہ میں زبردست آگ لگ گئی۔ جب آگ لگی تو اس وقت کمرشیل پلازہ کے نیچے بنے بینکوئٹ ہال میں ایک پارٹی چل رہی تھی۔ غنیمت رہی کہ آگ کمرشیل پلازہ کی اوپری منزل پر لگی تھی، وہ بھی باہر کی طرف۔ آگ کی خبر ملنے پر پہنچی فائر بریگیڈ کی ٹیم نے سخت مشقت کے بعد آگ پر قابو پایا اور کئی لوگوں کو ریسکیو کر باہر نکالا۔

فائر بریگیڈ سے ملی جانکاری کے مطابق غازی آباد واقع اندراپورم تھانہ حلقہ کے وسندھرا علاقہ کے سیکٹر-3 میں ریئل اسکوائر نام کا ایک کمرشیل پلازہ بنا ہوا ہے جس میں کنسفولک ہوٹل اور بینکوئٹ ہال ہے۔ پیر کی دوپہر 2 بجے فائر بریگیڈ محکمہ کو آگ لگنے کی خبر ملی۔ اس کے بعد موقع پر فائر بریگیڈ کی تین گاڑیوں کو روانہ کیا گیا اور تب تک سامنے کی سوسائٹی سے فائر فائٹنگ کے پائپ کو کھینچ کر آگ بجھانے کا کام شروع کر دیا گیا تھا۔ چیف فائر افسر راہل پال نے بتایا کہ ٹیم نے ڈیڑھ گھنٹے کی سخت مشقت کے بعد آگ پر قابو پا لیا گیا۔ کئی لوگوں کو ریسکیو کر وہاں سے باہر نکالا گیا۔

چیف فائر افسر نے بتایا کہ فی الحال کسی کے جان کے نقصان کی کوئی خبر نہیں ہے۔ پہلی نظر میں آگ لگنے کی وجہ شارٹ سرکٹ بتائی جا رہی ہے۔ اوپری منزل پر تقریباً چھ لوگ تھے جنھیں ریسکیو کیا گیا۔ نیچے بینکوئٹ ہال میں ایک 50ویں سالگرہ کی پارٹی چل رہی تھی، جس سے لوگوں کو باہر نکالا گیا۔