مراٹھا ریزرویشن: نائب وزیر اعلیٰ اجیت پوار کے بیان سے منوج جرانگے پاٹل ہوئے ناراض، کی سخت تنقید

ممبئی: مراٹھا ریزرویشن کی تحریک چلانے والے منوج جرانگے پاٹل نے نائب وزیر اعلیٰ اجیت پوار پر شدید تنقید کرتے ہوئے کہا ہے کہ ’’مراٹھا برادری کو ریزرویشن دینے میں تاخیر کرنے پر ریاستی حکومت سے جواب طلب کرنے کے بجائے وہ ریزرویشن کے ہی خلاف بول رہے ہیں۔ اگر اجیت پوار ریزرویشن لے کر آئیں تو میں دوڑ کر ان کے گلے سے لپٹ جاؤنگا۔‘‘ جرانگے پاٹل احمد نگر ضلع میں میڈیا کے نمائندوں سے بات کر رہے تھے۔ مراٹھا ریزرویشن کے لیے ممبئی کی جانب مارچ کا آج ان کا تیسرا دن ہے۔

منوج جرانگے پاٹل نے اپنے کارکنان اور ہزاروں حمایتیوں کے ساتھ 20 جنوری کو جالنہ ضلع کے اپنے گاؤں انتراولی سراٹی سے ممبئی تک مارچ شروع کیا ہے۔ انہوں نے ممبئی میں ریاستی حکومت کی جانب سے  ریزرویشن دیئے جانے کے اعلان تک غیر معینہ مدت تک بھوک ہڑتال کرنے کا عزم ظاہر کیا ہے۔ منوج پاٹل ریاست میں مراٹھوں کو کنبی ذات کا سرٹیفکیٹ دیئے جانے کا مطالبہ کر رہے ہیں تاکہ انہیں او بی سی درجے کے تحت سرکاری ملازمتوں اور تعلیم میں ریزرویشن مل سکے۔

منوج جرانگے پاٹل کے مارچ پر نائب وزیر اعلیٰ اجیت پوار نے کہا تھا کہ ممبئی آنے والوں میں سے اگر کسی نے بھی قانون ہاتھ میں لینے کی کوشش کی تو اس کے خلاف سختی سے نمٹا جائے گا۔ نائب وزیر اعلیٰ کے اس بیان پر جرانگے پاٹل نے جواب دیتے ہوئے کہا ہے کہ ’’اگر اجیت پوار ریزرویشن لے کر آئیں تو میں دوڑ کر ان کے گلے سے لپٹ جاؤں گا۔ انہیں کارروائی کرنے کی بات کہنے کی بھلا کیا ضرورت تھی۔‘‘ جرانگے پاٹل نے کہا کہ ’’انہیں مراٹھوں کے بچوں کی حمایت میں بولنا چاہئے تھا، ان سے کوئی کہے کہ آئیے ایک بار ہمارے پاس، 7 مہینوں میں وہ ایک بار بھی ہمارے پاس نہیں آئے۔‘‘

خبر رساں ایجنسی پی ٹی آئی سے بات کرتے ہوئے منوج جرانگے پاٹل نے کہا ہے کہ ’’اجیت پوار کو مراٹھا ریزرویشن کے مسئلے پر ریاستی حکومت سے جواب طلب کرنا چاہئے تھا۔ انہیں پوچھنا چاہئے تھا کہ ریزرویشن دینے میں تاخیر کیوں ہو رہی ہے، لیکن اس کے بجائے وہ ریزرویشن کے ہی خلاف بول رہے ہیں۔ جرانگے نے کہا کہ اگر ریاستی حکومت نے ان کے مارچ کے خلاف طاقت استعمال کرنے کی کوشش کی تو اس کے سنگین نتائج ظاہر ہوں گے۔ اپنے مطالبات کے لیے ریلیاں نکالنا اور مارچ کرنا جمہوریت کے دائرے میں آتا ہے۔‘‘ انہوں نے کہا کہ ’’میں نے ممبئی میں احتجاج و مظاہرے کی اجازت طلب کی ہے۔‘‘

واضح رہے کہ منوج جرانگے پاٹل نے اپنے مطالبات کے لیے یومِ جمہوریہ سے ممبئی میں بھوک ہڑتال شروع کرنے کا اعلان کیا ہے۔ دوسری جانب وزیر اعلیٰ ایکناتھ شندے نے ہفتہ (20 جنوری) کے روز کو کہا تھا کہ پسماندہ طبقات کمیشن مراٹھا برادری کی سماجی، معاشی اور تعلیمی پسماندگی کا مطالعہ کرنے کے لیے 23 جنوری 2024 سے ایک سروے کرے گا۔ وزیر اعلیٰ نے کمیشن کو 3 علاحدہ علاحدہ شفٹ میں سروے کرنے کا حکم دیا ہے جبکہ 21 جنوری کو انہوں نے منوج جرانگے پاٹل سے ممبئی نہ آنے کی اپیل بھی کی تھی۔