’اگر ہر غریب کا بچہ پڑھ گیا تو ہل جائے گا چوتھی پاس راجہ کا راج محل‘، سسودیا نے جیل سے لکھی چٹھی

دہلی آبکاری گھوٹالہ معاملے میں تہاڑ جیل میں بند دہلی کے سابق نائب وزیر اعلیٰ منیش سسودیا کا ایک خط سوشل میڈیا پر وائرل ہو رہا ہے۔ دہلی کے وزیر اعلیٰ کیجریوال نے بھی اس خط کو اپنے سوشل میڈیا اکاؤنٹ پر شیئر کیا ہے۔ اس خط کا عنوان ہے ’جیل سے منیش سسودیا کی چٹھی ملک کے نام‘۔ اس کے ذریعہ بغیر نام لیے منیش سسودیا نے مرکز کی مودی حکومت پر حملہ کیا ہے۔

وزیر اعلیٰ کیجریوال نے اس خط کو شیئر کرتے ہوئے لکھا ہے ’’جیل سے منیش جی کا خط۔‘‘ اس خط میں لکھا گیا ہے کہ ’’اگر ہر غریب کو ملی کتاب، تو نفرت کی آندھی کون پھیلائے گا۔ سب کے ہاتھوں کو مل گیا کام، تو سڑکوں پر تلوار کون لہرائے گا۔ اگر پڑھ گیا ہر غریب کا بچہ، تو چوتھی پاس راجہ کا راج محل ہل جائے گا۔ اگر ہر کسی کو مل گئی اچھی تعلیم اور سمجھ، تو ان کی واٹس ایپ یونیورسٹی بند ہو جائے گی۔ پڑھے لکھے اور سمجھداری کی بنیاد پر کھڑے سماج کو کوئی کیسے قومی نفرت کے مایہ جال میں پھنسائے گا۔ اگر پڑھ گیا ایک ایک غریب کا بچہ تو چوتھی پاس راجہ کا راج محل ہل جائے گا۔‘‘

اس خط میں سسودیا نے یہ بھی لکھا ہے کہ ’’اگر پڑھ گیا سماج کا ہر بچہ، تو تمھاری چالاکیوں اور منفی پالیسیوں پہ سوال اٹھائے گا۔ اگر غریب کو ملی قلم کی طاقت تو وہ اپنے ’من کی بات‘ سنائے گا۔ اگر پڑھ گیا ایک ایک غریب کا بچہ، تو چوتھی پاس راجہ کا راج محل ہل جائے گا۔ دہلی اور پنجاب کے اسکولوں میں ہو رہا شنکھ ناد پورے ہندوستان میں اچھی تعلیم کی روشنی جلائے گا۔ جیل بھیجو یا پھانسی دے دو، یہ کارواں رک نہیں پائے گا۔ اگر پڑھ گیا ہر غریب کا بچہ، راج محل تمھارا ہل جائے گا۔‘‘