یوپی الیکشن میں ممتا بنرجی کی انٹری، جلد اکھلیش کے لیے ووٹ مانگتی آئیں گی نظر

مغربی بنگال کی وزیر اعلیٰ ممتا بنرجی یوپی اسمبلی انتخاب میں سماجوادی پارٹی کے لیے ووٹ مانگیں گی، ممتا بنرجی آئندہ 8 فروری کو راجدھانی لکھنؤ میں سماجوادی پارٹی کی ورچوئل پریس کانفرنس سے خطاب کریں گی۔

تصویر سوشل میڈیا
تصویر سوشل میڈیا
user

قومی آوازبیورو

اتر پردیش اسمبلی انتخاب میں اب ترنمول کانگریس کی چیف اور مغربی بنگال کی وزیر اعلیٰ ممتا بنرجی کی بھی انٹری ہونے والی ہے۔ ترنمول کانگریس سربراہ ممتا بنرجی یوپی میں سماجوادی پارٹی سربراہ اکھلیش یادو کے لیے ووٹ مانگیں گی۔ آئندہ 8 فروری کو ممتا بنرجی راجدھانی لکھنؤ میں سماجوادی پارٹی چیف کے ساتھ ایک ورچوئل پریس کانفرنس سے خطاب کریں گی۔ خبر ہے کہ اس کے بعد وہ پی ایم مودی کے پارلیمانی حلقہ وارانسی میں بھی سماجوادی پارٹی کے لیے آن لائن تشہیر کریں گی۔

دراصل گزشتہ مہینے ہی ممتا بنرجی نے کہا تھا کہ اگر ضروری ہوا تو ان کی پارٹی اتر پردیش کے اسمبلی انتخاب میں اکھلیش یادو کے لیے تشہیر کرے گی۔ جس کے بعد ممتا اور اکھلیش کے ایک ساتھ پبلک ریلی کرنے کی خبر آنے لگی تھی۔ لیکن کورونا کے سبب انتخابی کمیشن کی طرف سے لگائی گئی پابندیوں کے سبب ایسا نہیں ہو پایا۔ اب خبر آ رہی ہے کہ ممتا بنرجی 8 فروری کو لکھنؤ میں سماجوادی پارٹی کی ایک ورچوئل ریلی سے خطاب کریں گی۔


واضح رہے کہ ممتا بنرجی اور اکھلیش یادو کے درمیان ہمیشہ سے اچھے تعلقات رہے ہیں۔ ملک میں بی جے پی کے خلاف غیر کانگریسی اتحاد کی قیادت اپنے ہاتھوں میں لینے کی کوشش میں مصروف ممتا بنرجی کی حمایت اکھلیش یادو بھی ایک طرح سے کر چکے ہیں۔ اس سے پہلے ممتا بنرجی کے بی جے پی کے خلاف محاذ بنانے کی کوششوں پر اکھلیش نے کہا تھا کہ جس طرح سے انھوں نے مغربی بنگال میں بی جے پی کا صفایا کیا ہے اسی طرح سے اتر پردیش میں سماجوادی پارٹی بی جے پی کا صفایا کرے گی۔

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔