اسپتال سے چھٹی ملنے کے بعد حرکت میں ممتا بنرجی، آج ویل چیئر سے نکالیں گے مارچ

کولکاتا: ترنمول کانگریس (ٹی ایم سی) کی سربراہ ار وزیر اعلیٰ ممتا بنرجی چوٹ لگنے کے بعد پہلی مرتبہ عوامی طور پر نمودار ہونے جا رہی ہیں۔ انتخابی تشہیر کے تحت وہ آج ویل چیئر پر بیٹھ کر مارچ نکالیں گی۔ ممتا بنرجی دوپہر ایک بجے کولکاتا میں مارچ نکالیں گی اور اپنے مارچ کا آغاز میو روڈ پر واقع گاندھی کے مجسمہ سے کریں گی۔ دوسری طرف، ٹی ایم سی نے اپنے آج کے طے شدہ پروگرام میں تبدیلی کرتے ہویے آج کے مجوزہ انتخابی منشور کے اجرا کو موخر کر دیا ہے۔

ممتا بنرجی نندی گرام میں پرچہ نامزدگی داخل کرتے وقت چوٹ لگنے کے بعد پہلی مرتبہ ویل چیئر کے ساتھ اسٹیج پر نظر آئیں گی۔ اس کے بعد وہ 15 مارچ سے عوامی جلسوں کی شروعات کریں گی۔ ممتا بنرجی 15 مارچ کو پرولیا، 16 مارچ کو بانکورا اور 17 مارچ کو جھارگرام میں ریلی سے خطاب کریں گی۔

خیال رہے کہ مغربی بنگال کی وزیر اعلیٰ ممتا بنرجی کے چوٹ لگنے جانے کے حوالہ سے خصوصی مبصرین کی ٹیم نے الیکشن کمیشن کو رپورٹ سونپی ہے۔ رپورٹ میں کہا گیا کہ وزیر اعلیٰ سخت حفاظتی دائرے میں تھیں اور وہ حادثاتی طور پر زخمی ہوئی ہیں۔ مبصرین نے کسی بھی طرح کے حملے کو خارج الامکان قرار دیا۔ وہیں چیف سکریٹری آلاپن بندوپادھیائے نے بھی الیکشن کمیشن کو اپنی جانچ رپورٹ سونپ دی ہے۔