کرناٹک میں محکمہ فوڈ سیکورٹی و ڈرگس کی بڑی کارراوئی، خراب معیار کے سبب 133 دوائیوں کا لائسنس معطل

کرناٹک میں فوڈ سیکورٹی اور محکمہ ڈرگس ایڈمنسٹریشن ڈیپارٹمنٹ نے قوانین کی خلاف ورزی کے معاملہ میں سخت کارروائی کی ہے۔ محکمہ ڈرگس نے جون ماہ میں سخت قدم اٹھاتے ہوئے 133 دوائیوں کا لائسنس معطل کر دیا اور 20 دوائیوں کے لائسنس کو رد کر دیا ہے۔ یہ قدم ان دکانوں اور کمپنیوں کے خلاف اٹھایا گیا ہے جنہوں نے ڈرگس اینڈ کاسمیٹکس ایکٹ 1940 کے قوانین کی خلاف ورزی کی تھی۔

واضح ہو کہ محکمہ ڈرگس ایڈمنسٹریشن ڈیپارٹمنٹ کی جانب سے جون میں کُل 2544 مقامات کا معائنہ کیا گیا۔ بنگلورو، ہبلی اور بلاری کی سرکاری لیبوں میں 1333 ادویات کے سیمپل کی جانچ کی گئی۔ ان میں سے 1292 سیمپل درست پائے گئے، جبکہ 41 سیمپل خراب معیار کے نکلے۔ اس کے بعد خراب ادویات، جن کی قیمت 40 لاکھ سے زائد تھی، بازار سے واپس منگوا کر ضبط کر لی گئی ہیں۔ گزشتہ 3 ماہ میں محکمہ نے قانون کی خلاف ورزی کرنے والی کمپنیوں کے خلاف 81 مقدمے عدالتوں میں دائر کیے ہیں۔ اس کے لیے پوری ریاست میں 122 بلڈ سنٹرس کی جانچ کی گئی، 44 سنٹرس کو نوٹس جاری کیا گیا اور 80 سنٹرس کو اصلاح کرنے کی ہدایت دی گئی۔

قابل ذکر ہے فوڈ سیفٹی اینڈ اسٹینڈرس ایکٹ 2006 کے تحت جون ماہ میں 1557 اسٹریٹ فوڈ وینڈرس کی بھی جانچ کی گئی تھی۔ اس دوران قانون کی خلاف ورزی کرنے پر 406 دکانوں کو نوٹس جاریا کیا گیا اور موقع پر ہی 44500 روپے کا جرمانہ بھی عائد کیا گیا۔ اس معاملہ پر محکمہ نے واضح کیا کہ یہ کارراوئی صحت عامہ اور سیکورٹی کے مدنظر کی گئی اور مستقبل میں بھی ایسے معائنے باقاعدگی سے جاری رہیں گے۔