آندھرا پردیش کے کرنول میں دلخراش سڑک حادثہ، مندر جا رہے 5 افراد جان بحق، 2 بچے شامل

آندھرا پردیش کے ضلع کرنول میں ایک دلخراش سڑک حادثے میں پانچ افراد جان بحق ہو گئے، جن میں دو بچے بھی شامل ہیں۔ پولیس کے مطابق متوفی افراد میں دو مرد، ایک خاتون اور دو بچے شامل ہیں۔ یہ سب کولار کے گاؤں چکہ ہوسلی سے منترالیم میں واقع راگھویندر سوامی مندر جا رہے تھے۔

حادثہ اس وقت پیش آیا جب دو کاروں کی آمنے سامنے ٹکر ہو گئی۔ تصادم اتنا شدید تھا کہ موقع پر ہی پانچ افراد کی موت ہو گئی، جبکہ دو دیگر شدید زخمی ہوئے ہیں جنہیں فوری طور پر اسپتال منتقل کیا گیا۔

علاقائی پولیس نے بتایا کہ حادثہ کرنول ضلع کے کوٹیکل گاؤں کے قریب پیش آیا۔ یمیگنور کے سب ڈویژنل پولیس افسر این برگھاوی کے مطابق حادثہ علی الصبح 4.30 بجے قومی شاہراہ نمبر 167 پر پیش آیا۔ انہوں نے بتایا کہ حادثے میں 5 افراد کی موقع پر ہی موت ہو گئی۔

اس حادثہ میں دو دیگر لوگ زخمی بھی ہوئے ہیں جن میں سے ایک کی حالت تشویشناک ہے۔ شدید طور سے زخمی شخص کو مزید علاج کے لیے کرنول کے سرکاری جنرل اسپتال بھیج دیا گیا ہے۔ پولیس نے بتایا کہ اس حادثے کے متاثرین کرناٹک کے کولار کے رہنے والے تھے۔ پولیس نے معاملہ درج کر کے تفتیش شروع کر دی ہے۔