مہاراشٹر بلدیاتی انتخابات 2026: سچن تندولکر کی ووٹنگ، فلمی اداکاروں کی بھرپور شرکت

مہاراشٹر کے 29 میونسپل کارپوریشنوں میں جمعرات کو بلدیاتی انتخابات کے تحت ووٹنگ کا عمل صبح ساڑھے سات بجے شروع ہوا جو شام ساڑھے پانچ بجے تک جاری رہے گا۔ اس موقع پر شہریوں کے ساتھ ساتھ فلمی دنیا کی معروف شخصیات نے بھی پولنگ اسٹیشن پہنچ کر اپنے حقِ رائے دہی کا استعمال کیا اور عوام کو جمہوری عمل میں حصہ لینے کا پیغام دیا۔

بالی ووڈ اداکار نانا پاٹیکر، اداکارہ سانیا ملہوترا اور اداکارہ و مصنفہ ٹوئنکل کھنہ نے مختلف پولنگ مراکز پر ووٹ ڈالے۔ ووٹنگ کے بعد نانا پاٹیکر نے میڈیا سے گفتگو میں کہا کہ ووٹ ڈالنا ہمارے وجود کی پہچان ہے، اسی لیے وہ علی الصباح پونے سے ممبئی آئے تاکہ اپنے حقِ رائے دہی کا استعمال کر سکیں۔ انہوں نے شہریوں سے اپیل کی کہ وہ ضرور ووٹ ڈالیں۔

سانیا ملہوترا اندھیری کے لوکھنڈوالا علاقے میں واقع ایک پولنگ بوتھ پہنچیں، جہاں انہوں نے شناختی دستاویزات پیش کرنے کے بعد ووٹ ڈالا۔ ان کی سادگی اور نظم و ضبط کو وہاں موجود لوگوں نے سراہا۔ ٹوئنکل کھنہ نے بھی بی ایم سی انتخابات میں حصہ لیتے ہوئے کہا کہ ووٹنگ انسان کو اپنی کہانی پر اختیار اور تبدیلی کی امید دیتی ہے، اسی لیے وہ باقاعدگی سے ووٹ ڈالتی ہیں۔

ان سے قبل اداکار اکشے کمار نے بھی ووٹ ڈال کر ممبئی کے شہریوں سے اپیل کی تھی کہ روزمرہ مسائل پر شکایت کرنے کے بجائے ووٹنگ کے ذریعے ذمہ داری ادا کریں۔ ان کا کہنا تھا کہ بہتر انتظام کے لیے صحیح نمائندوں کا انتخاب ضروری ہے۔

فلمی شخصیات کے ساتھ ساتھ سابق انڈین کرکٹر سچن تندولکر بھی ووٹنگ کے لیے پولنگ اسٹیشن پہنچے۔ انہوں نے کہا کہ ووٹ کے ذریعے ہر شہری اپنی رائے کا اظہار کر سکتا ہے اور یہ موقع ضائع نہیں ہونا چاہیے۔

دریں اثنا، مختلف سیاسی رہنماؤں نے بھی اپنے ووٹ ڈالے۔ راشٹریہ سویم سیوک سنگھ کے سربراہ موہن بھاگوت، مرکزی وزرا اور ریاستی سطح کے کئی سیاست دان پولنگ مراکز پر نظر آئے۔ ان سب نے عوامی شرکت کو جمہوریت کی مضبوطی کے لیے اہم قرار دیا۔

ریاست بھر میں ہونے والے ان انتخابات میں ہزاروں نشستوں پر مقابلہ ہے اور ووٹنگ کے نتائج سے مہاراشٹر کی شہری سیاست کی سمت طے ہونے کی توقع کی جا رہی ہے۔