نتیش راج میں مہادلت پر مظالم جاری، پولس لاپروا

بکسر کے نندن گاؤں میں وزیر اعلیٰ نتیش کمار کے قافلے پر پتھراؤ کے معاملے میں دلت خواتین پر مظالم اور پولس کے ذریعہ انھیں دیر رات جیل کی سلاخوں میں بھیجے جانے کے بعد اب بہٹا میں بھی ایک مہادلت خاتون کے ساتھ چھیڑ چھاڑ اور پولس لاپروائی کا معاملہ منظر عام پر آیا ہے۔ نوبت پور واقع کرن پورا گاؤں باشندہ سنجے پاسوان کی بیوی پایل راج کا الزام ہے کہ گزشتہ 27 جنوری کو وہ بہٹا واقع محکمہ بجلی کے دفتر گئی تھی جہاں اس کے ساتھ نازیبا سلوک کیا گیا۔

پایل راج کا کہنا ہے کہ اس کے گھر میں بجلی کا میٹر خراب ہو گیا تھا جس کی شکایت کرنے وہ محکمہ بجلی کے دفتر میں گئی تھی۔ وہاں تنہا دیکھ کر محکمہ کے اگزیکٹیو انجینئر ونود کمار اور ان کے ہی دفتر میں بطور کلرک کام کرنے والے رنبیر کمار نے جلد کام کروانے کے نام پر چھیڑخانی کی۔ جب پایل نے اس کی مخالفت کی تو ذات پات پر مبنی لفظ کا استعمال کیا گیا اور ساتھ ہی کسی کو بتانے کی صورت میں جان سے مارنے کی دھمکی بھی دی گئی۔ متاثرہ خاتون نے اس سلسلے میں مقامی تھانہ میں معاملہ بھی درج کرا دیا ہے لیکن واقعہ کے 15 دن بعد بھی ملزمین پر کوئی کارروائی نہٰں ہوئی ہے۔

اس سلسلے میں پولس کا رویہ لاپروائی بھرا ہے۔ بہٹا تھانہ پولس افسر رنجیت کمار سنگھ کا کہنا ہے کہ شروعاتی جانچ میں پایل راج کے گھر کا بجلی میٹر پانچ سال پہلے خراب ہونے کی بات سامنے آئی ہے۔ لیکن جب ان سے یہ پوچھا گیا کہ کیا متاثرہ خاتون کا الزام بے بنیاد ہے؟ اس پر رنجیت کمار نے ’معاملے کی جانچ ہو رہی ہے‘ جیسا رٹا رٹایا جملہ استعمال کیا۔ انھوں نے کہا کہ جانچ مکمل ہونے کے بعد ہی اس سلسلے میں کچھ کہا جا سکتا ہے۔ لیکن پایل راج نے رنجیت کمار کے ان دعوؤں کو غلط قرار دیا ہے۔ ان کا کہنا ہے کہ اگر 5 سال سے میٹر خراب تھا تو ان کے پاس بل کیسے آ رہا تھا؟ پایل نے یہ بھی کہا کہ میں نے معاملہ چھیڑ چھاڑ کا درج کرایا ہے، اگر تھانہ کی سطح پر ان کی شکایت پر کارروائی نہیں ہوئی تو وہ بڑے افسران کا دروازہ کھٹکھٹائیں گی۔

مہادلت طبقہ کی خاتون کے ساتھ محکمہ بجلی کے افسران کی چھیڑ چھاڑ کی خبر سیاسی گلیاروں میں بھی پھیل گئی ہے۔ ہندوستانی عوام مورچہ (ہم) کے قومی صدر اور سابق وزیر اعلیٰ جیتن رام مانجھی نے اس واقعہ کو افسوسناک قرار دیتے ہوئے کہا کہ اس معاملے کی ایماندارانہ جانچ ہونی چاہیے۔ اگر الزام صحیح ہے تو قصورواروں کے خلاف سخت کارروائی ہونی چاہیے۔ مانجھی نے مزید کہا کہ ’’وہ اپنی سطح پر اس معاملے کی جانچ کے لیے ٹیم بھیجیں گے۔ اگر متاثرہ خاتون سچ کہہ رہی ہے تو میں اپنی سطح پر بھی کارروائی کنے پر غور کروں گا۔‘‘

مہادلت طبقہ کی خاتون کے ساتھ نازیبا حرکت کرنے کی ’جن ادھیکار پارٹی لوک تانترک‘ کے ریاستی ترجمان رجنیش تیواری نے بھی سخت تنقید کی ہے۔ تیواری نے کہا کہ اگر متاثرہ خاتون کو انصاف نہیں ملا تو اس کے لیے ان کی پارٹی سڑک پر اترے گی۔