جے پور-اجمیر ہائی وے پر ایل پی جی ٹرک میں زوردار دھماکہ، آگ کے شعلوں نے مچائی تباہی، ایک ہلاک، درجنوں زخمی

جے پور: راجستھان میں گزشتہ دیر رات بڑا سڑک حادثہ پیش آیا۔ جے پور-اجمیر ہائی وے پر ایل پی جی سلنڈروں سے لدے ایک ٹرک اور کیمیکل لے جانے والے ایک ٹینکر میں بھیانک ٹکر ہوگئی۔ دونوں گاڑیوں کی ٹکراس قدر بھیانک تھی کہ اس سے سلنڈر لے جانے والے ٹرک میں زوردار دھماکہ ہوا جس کی آواز کئی کلومیٹر دورتک سنی گئی۔ حادثے کے بعد دونوں ٹرک آگ کا گولہ بن گئے جو کئی کلومیٹر دور تک دکھائی دے رہا تھا۔ سلنڈر کے ٹکڑے آس پاس موجود گاڑیوں پر گرے جس سے ایک درجن سے زائد گاڑیوں کو نقصان پہنچا اور متعدد افراد زخمی ہوگئے۔

حادثے میں ٹینکر ڈرائیور کی موقع پر ہی موت ہو گئی جبکہ ٹرک ڈرائیور کے بھی زندہ جلنے کا خدشہ ہے۔ غنیمت رہی کہ سڑک پر آس پاس موجود لوگوں کے درمیان کسی جانی نقصان کی اطلاع نہیں ہے۔ تاہم واقعہ میں متعدد افراد زخمی ہوئے ہیں۔یہ حادثہ جے پور شہر سے تقریباً 70 کلومیٹر دوردودو علاقے میں پیش آیا۔ آج ( 8 اکتوبر) علی الصبح تقریباً 6:00 بجے جے پور- اجمیر ہائی وے پر 25 کلو میٹر طویل ٹریفک جام دیکھنے میں آیا۔ یہ ٹریفک جام گھنٹوں تک جاری رہ سکتا ہے کیونکہ آگ بجھانے کے بعد ملبہ صاف کرنے میں وقت لگ رہا ہے۔

سلنڈروں سے بھرے ٹرک میں آگ لگنے اور پھٹنے سے کئی لوگوں کے زخمی ہو نے کے اندیشے سے وزیر اعلی بھجن لال شرما فوراً حرکت میں آگئے۔ انہوں نے نائب وزیر اعلیٰ پریم چند بیروا کو جائے وقوعہ کے لیے روانہ کیا۔ وزیراعلیٰ کے احکامات کے بعد جائے حادثہ سے شہر کے مرکزی اسپتال تک کے راستے کو گرین کوریڈور میں تبدیل کردیا گیا۔ جے پور پولیس کمشنر کی قیادت میں راحت اور بچاؤ کام تیزی سے جاری ہے۔

اس واقعہ کے مد نظر جے پور کے ایس ایم ایس اسپتال کو بھی الرٹ کردیا گیا ہے۔ ڈاکٹروں اور دیگر طبی عملے کی ٹیم زخمیوں کے علاج کے لیے تیار ہے۔ بتایا جارہا ہے کہ اطلاع ملتے ہی ایمبولینسز اور فائر بریگیڈ کی 20 گاڑیاں گرین کوریڈور کے ذریعے فوری طور پر جائے وقوعہ پر پہنچ گئیں۔ آگ پر ڈھائی گھنٹے کی جدوجہد کے بعد قابو پایا جاسکا۔

خبروں کے مطابق دھماکے کے بعد سلنڈر کے ٹکڑے وہاں سے گزرنے والی کئی دیگر گاڑیوں پر بھی گرے۔ اس دوران تقریباً 10-12 گاڑیوں کو نقصان پہنچا اور پانچ سے زیادہ لوگ زخمی ہوئے۔ دھماکوں کی آواز کئی کلومیٹر دور تک سنی گئی اور آگ کے شعلے دور دور تک دکھائی دے رہے تھے۔ جس سے کچھ دیر کے لئے پورے علاقے میں افراتفری مچ گئی۔

عینی شاہدین کے مطابق دونوں گاڑیوں کی ٹکر بعد کیمیکل ٹینکر کے اگلے حصے میں آگ لگ گئی جس کے سبب ڈرائیور کو اپنی جان بچانے کا موقع نہیں ملا۔ اس دوران ٹینکر کے ڈرائیور کی موت ہوگئی۔ حالانکہ کیمیکل سے بھرے ٹینکر اور ایل پی جی سلنڈر ٹرک میں آگ لگنے کے باوجود جان کا زیادہ نقصان نہیں ہونے پر انتظامیہ نے راحت کا سانس لیا ہے۔ افسران کا خیال ہے کہ ایک بہت بڑا حادثہ ہونے سے بچ گیا۔