دہلی میں سردی کم، مختلف ریاستوں میں بارش کی پیشگوئی

محکمہ موسمیات کا کہنا ہے کہ اگلے 3 سے 4 دنوں تک ملک کی کئی ریاستوں میں موسم تبدیل ہونے جا رہا ہے اور دہلی سمیت ملک کے کئی حصوں میں بارش ہو سکتی ہے

دہلی کی سردی / Getty Images
دہلی کی سردی / Getty Images
user

قومی آوازبیورو

نئی دہلی: شمالی ہندوستان میں شدید سردی ختم ہو رہی ہے۔ محکمہ موسمیات کا کہنا ہے کہ اگلے 3 سے 4 دنوں تک ملک کی کئی ریاستوں میں موسم تبدیل ہونے والا ہے، جس کی وجہ سے ملک کے کئی حصوں میں بارش ہو سکتی ہے۔ اس کے ساتھ ہی پنجاب اور ہریانہ کے کچھ حصوں میں سردی کی لہر کا امکان ہے۔ وہیں ملک کی راجدھانی دہلی میں ہلکی بارش ہو سکتی ہے۔

موسم کی پیشن گوئی کرنے والی ایجنسی اسکائی میٹ کے مطابق شمال مغربی اتر پردیش میں ایک سائیکلونک سرکولیشن بن گیا ہے۔ وہیں، جنوبی اوڈیشہ پر ایک طوفان بن رہا ہے۔ ان وجوہات کی بنا پر ملک کی موسمی سرگرمیوں میں تبدیلیاں دیکھنے کو مل رہی ہیں۔

دہلی میں تیز دھوپ کی وجہ سے سردی میں کمی آئی ہے۔ محکمہ موسمیات کا کہنا ہے کہ ملک کی راجدھانی دہلی میں 14 فروری کو بارش ہو سکتی ہے۔ آئی ایم ڈی کے مطابق دہلی میں کم از کم درجہ حرارت پورے ہفتے 7 سے 10 ڈگری سیلسیس کے درمیان رہ سکتا ہے۔ اس کے ساتھ ہی زیادہ سے زیادہ درجہ حرارت 24 سے 26 ڈگری سیلسیس کے درمیان رہنے کا امکان ہے۔


موسم کی پیشین گوئی کرنے والی ایجنسی اسکائی میٹ کے مطابق آئندہ 24 گھنٹوں کے دوران شمالی تلنگانہ میں ہلکی سے درمیانی بارش کا امکان ہے۔ ساتھ ہی، کل سے جزائر انڈمان اور نکوبار میں ہلکی سے درمیانی بارش ہو سکتی ہے۔ اس کے علاوہ مشرقی مدھیہ پردیش، ودربھ اور چھتیس گڑھ میں 10 سے 14 فروری کے درمیان بارش متوقع ہے۔ اس کے ساتھ ہی، 11 فروری کو وسطی مہاراشٹر اور مراٹھواڑہ میں، 12 فروری کو اڈیشہ میں اور 11 سے 12 فروری کے درمیان اتر پردیش، بہار اور جھارکھنڈ میں ہلکی سے درمیانی بارش کا امکان ہے۔

اس کے ساتھ ہی، گنگا مغربی بنگال میں 13 سے 15 فروری کے درمیان بارش کی سرگرمیاں دیکھی جائیں گی۔ مشرقی مدھیہ پردیش، ودربھ اور چھتیس گڑھ میں گرج چمک کے ساتھ بارش کا امکان ہے۔ اس کے علاوہ شمالی راجستھان اور گنگا مغربی بنگال میں 1 یا 2 مقامات پر سردی کی لہر چل سکتی ہے۔

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔


;