اہم خبریں: دہلی میونسپل کارپوریشن ترمیمی بل 2022 راجیہ سبھا سے منظور

راجیہ سبھا نے آج دہلی میونسپل کارپوریشن (ترمیمی) بل 2022 کو صوتی ووٹوں سے منظور کر لیا۔ اس بل کو دہلی میونسپل کارپوریشن ایکٹ 1957 میں ترمیم کے مقصد سے پیش کیا گیا ہے، تاکہ دہلی کے تین میونسپل کارپوریشنوں کو ایک ہی ادارے میں متحد کیا جا سکے۔

دہلی جلد بورڈ نے اپنے اس حکم کو واپس لے لیا ہے جس میں اس نے اپنے تمام مسلم ملازمین کو رمضان کے دوران جلد چھٹی دینے کے احکامات جاری کئے تھے۔ اس سے پہلے جاری کئے گئے سرکلر میں مسلم ملازمین کو مقررہ وقت سے 2 گھنٹے پہلے کام سے فارغ ہو جانے کیا اجازت دی گئی تھی۔ اس سرکلر کے جاری ہونے کے بعد ہندتواوادیوں نے ہنگامہ آرائی شروع کر دی تھی۔ کچھ ہندتواوادیوں کا کہنا تھا کہ کیجریوال حکومت مسلم ملازمین کو تو رمضان کے دوران رعایت دے رہی ہے لیکن ہندو ملازمین کو نوراتری کے دوران کوئی راحت نہیں دی جا رہی۔

انفورسمنٹ ڈائریکٹوریٹ نے 1034 کروڑ روپے کے پاترا چاول اراضی گھوٹالہ معاملے میں شیوسینا لیڈر سنجے راؤت کی ملکیت قرق کر لی ہے۔ اس تعلق سے سنجے راؤت کا سخت رد عمل سامنے آیا ہے۔ انھوں نے کہا ہے کہ ’’کیا میں وجئے مالیہ، میہل چوکسی، نیرو مودی یا امبانی-اڈانی ہوں؟ چاہے ہماری پراپرٹی ضبط ہو، گولی مارو یا جیل بھیجو، ہم نہیں ڈریں گے۔ 2 سال سے خاموش بیٹھانے کی کوشش ہے، خاموش بیٹھا کیا؟ جس کو پھدکنا ہے، ناچنا ہے ناچنے دو۔ آگے پتہ چلے گا کہ سچ کیا ہے اور جھوٹ کیا ہے۔‘‘

ستنا: مدھیہ پردیش کے ضلع ستنا کے میہر تھانہ علاقہ کے بھینسا پور گاؤں میں پولیس نے ایک کسان کے قتل کے معاملے میں مہیش ساہو نامی کسان کے دو بیٹوں کو گرفتار کیا گیا ہے۔ پولیس ذرائع کے مطابق سریندر ساہو اور اس کے چھوٹے بھائی کو کل تین دن قبل کیے گئے قتل کے سلسلے میں گرفتار کیا گیا۔ مہیش ساہو کی حرکات سے پریشان ہو کر ملزمان نے اس واردات کو انجام دیا۔

شیو سینا لیڈر سنجے راوت نے کہا کہ ’’سری لنکا کی صورتحال بہت تشویشناک ہے۔ بھارت بھی اسی موڑ پر ہے۔ ہمیں اس صورت حال کو سنبھالنا ہوگا، ورنہ ہم سری لنکا سے بھی بدتر صورتحال سے دوچار ہوسکتے ہیں۔

جکارتہ: انڈونیشیا کے مشرقی صوبے شمالی مالوکو میں منگل کی صبح زلزلے کے شدید جھٹکے محسوس کیے گئے۔ موسمیات، آب و ہوا اور جیو فزکس ایجنسی نے بتایا کہ ریختر پیمانے پر زلزلے کی شدت 6.0 فیصد تھی۔

دہلی: عوام پر تیل قیمتوں کی مار جاری ہے۔ ملک میں تیل کی قیمتوں میں پھر اضافہ ہوا ہے۔ دہلی میں پٹرول اور ڈیزل کی قیمت میں 80 پیسے کا اضافہ ہوا ہے۔ دارالحکومت میں پٹرول 104.61 روپے اور 95.87 روپے فی لیٹر فروخت ہو رہا ہے۔ ممبئی میں پٹرول کی قیمت 119.67 روپے (84 پیسے کا اضافہ) اور ڈیزل کی قیمت 103.92 روپے (85 پیسے کا اضافہ) فی لیٹر ہے۔