اہم خبریں: ’پے سی ایم‘ اور ’پے پی ایم‘ کی بھاجپا سرکار، پورے ملک میں ’ڈبل انجن‘ کا بھرشٹاچار... راہل گاندھی

کانگریس کے سابق صدر راہل گاندھی نے ایک بار پھر سوشل میڈیا کے ذریعہ بدعنوانی معاملے پر بی جے پی حکومت کو تنقید کا نشانہ بنایا ہے۔ انھوں نے تازہ ٹوئٹ میں لکھا ہے ’’انتخاب کے پہلے- نہ کھاؤں گا، نہ کھانے دوں گا۔ انتخاب کے بعد- ’40 فیصد کمیشن‘ کھاؤں گا، پھر دیوالی پر مٹھائی کے ڈبوں میں کرناٹک میڈیا کو رشوت بھجواؤں گا۔‘‘ اس ٹوئٹ کے آخر میں راہل گاندھی لکھتے ہیں ’’پے سی ایم‘ اور ’پے پی ایم‘ کی بھاجپا سرکار، پورے ملک میں ’ڈبل انجن‘ کا بھرشٹاچار (بدعنوانی)۔‘‘

سابق امریکی صدر ڈونالڈ ٹرمپ نے 44 ارب ڈالر میں ٹوئٹر خریدنے کے لیے ایلن مسک کی تعریف کی اور کہا کہ مائیکرو بلاگنگ پلیٹ فارم اب سمجھدار ہاتھوں میں ہے۔ ساتھ ہی انھوں نے کہا کہ یہ پلیٹ فارم سمجھدار ہاتھوں میں ضرور ہے، لیکن میرے بغیر یہ کامیاب نہیں ہو سکتا۔

سری نگر: پولیس نے سری نگر میں قرآن شریف کی مبینہ طور پر بے حرمتی کرنے کے الزم میں ایک شخص کو گرفتار کیا ہے۔ پولیس کا کہنا ہے کہ گرفتار شدہ شخص ذہنی طور معذور لگ رہا ہے۔ سری نگر پولیس نے اپنے ٹوئٹر ہینڈل پر ایک ٹوئٹ میں کہا: ’سری نگر کے خان مسجد گوجوارہ میں بے حرمتی کا ایک واقعہ پیش آیا جس میں ایک شخص نے قرآن پاک کو پانی میں پھینک دیا‘۔ ٹوئٹ میں کہا گیا کہ ’ملزم ارشاد احمد میر ساکن ملورہ سری نگر کو شبانہ چھاپوں کے دوران گرفتار کیا گیا‘۔ پولیس کا ٹوئٹ میں کہنا ہے کہ گرفتار شدہ شخص ذہنی طور معذور لگ رہا اور اس ضمن میں پولیس اسٹیشن نوہٹہ میں ایک کیس بھی درج کیا گیا۔

کرناٹک پولیس نے ہفتہ کے روز کرناٹک کے اوڈپی (جنوب کنڑ) ضلع میں چلتی کار سے پٹاخے پھوڑنے سے عوامی تحفظ کو خطرے میں ڈالنے کے الزام میں ایک نوجوان کو گرفتار کیا ہے۔ اس کی شناخت وشال کوہلی کے طور پر ہوئی ہے۔ پولیس نے اس کی گاڑی بھی ضبط کر لی ہے۔

اسلام آباد: الیکشن کمیشن آف پاکستان (ای سی پی) نے پاکستان تحریک انصاف (پی ٹی آئی) چیئرمین عمران خان کو این اے-45 کرم میں بار بار ضابطہ اخلاق کی خلاف ورزی کرنے پر یکم نومبر کو طلب کر لیا ہے۔

اورنگ آباد: بہار میں اورنگ آباد ضلع کے نگر تھانہ علاقے میں ہفتہ کو ایک گھر میں رسوئی گیس سلنڈر پھٹنے سے 25 افراد زخمی ہو گئے۔ پولیس ذرائع نے یہاں بتایا کہ شاہ گنج علاقہ میں انل گوسوامی کے گھر میں چائے بناتے ہوئے رسوئی گیس سلنڈر میں آگ لگ گئی۔ اسے بجھانے کے دوران گیس سلنڈر پھٹ گیا جس سے تقریباً 25 افراد زخمی ہو گئے۔ زخمیوں میں کچھ پولیس اہلکار بھی شامل ہیں۔ ذرائع نے بتایا کہ زخمیوں کو اورنگ آباد صدر اسپتال میں داخل کرایا گیا ہے۔

دہلی: فضائی آلودگی سے دہلی کا دم گھٹنے لگا ہے! آج دارالحکومت میں کئی جگہوں پر اے قیو آئی 400 سے زیادہ تجاوز کرگیا۔ مرکزی آلودگی کنٹرول بورڈ کے اعداد و شمار کے مطابق، آج دارالحکومت کے کئی علاقوں میں ہوا کے معیار کا انڈیکس 400 سے تجاوز کر گیا ہے، جو شدید زمرے میں آتا ہے۔ دہلی میں سب سے زیادہ ہوا کا خراب معیار آنند وہار میں ریکارڈ کیا گیا۔