اہم خبریں: غلام نبی آزاد برسوں تک جس پارٹی میں رہے، انھیں اسی پارٹی کو بدنام کرنے کا کام سونپا گیا... جئے رام رمیش

کانگریس کے سینئر لیڈر جئے رام رمیش نے اپنے ایک تازہ ٹوئٹ میں غلام نبی آزاد پر دھوکہ دینے اور اپنی پارٹی کو بدنام کرنے کی کوشش کا الزام عائد کیا۔ انھوں نے ٹوئٹ میں لکھا ہے کہ ’’آزاد برسوں تک جس پارٹی میں رہے، جہاں انھیں سب کچھ ملا، انھیں اسی پارٹی کو بدنام کرنے کا کام سونپا گیا ہے۔ یہ ان کی سطح کو مزید گرا رہا ہے۔‘‘ وہ مزید لکھتے ہیں ’’آخر کیوں ہر منٹ وہ اپنے دھوکہ کو درست ٹھہرا رہے ہیں؟ انھیں آسانی سے بے نقاب کیا جا سکتا ہے، لیکن ہم اپنی سطح کیوں گرائیں؟‘‘

کشن گنج: بہار کے کشن گنج ضلع کے ٹھاکر گنج تھانہ علاقے میں پیر کو گاؤں والوں نے دو چوروں کو پیٹ پیٹ کر ہلاک کر دیا۔ پولیس ذرائع نے یہاں بتایا کہ جیران گچھ پنچایت کے ماٹی کوڑا گاؤں میں چوری کرنے آئے دو چوروں کو گاؤں والوں نے پکڑ کر پیٹ پیٹ کر مار ڈالا۔ مرنے والوں کی شناخت جلال (46) اور جولو (26) کے طور پر ہوئی ہے۔ دونوں املجھاری تھانہ علاقہ کے تحت پاٹھماری کے رہنے والے تھے۔ دونوں کے خلاف چوری کے متعدد مقدمات درج ہیں۔ ذرائع نے بتایا کہ لاشوں کو پوسٹ مارٹم کے لیے صدر اسپتال کشن گنج بھیج دیا گیا ہے۔ معاملے کی جانچ کی جا رہی ہے۔

جکارتہ: انڈونیشیا کے مغربی صوبے مغربی سماترا میں پیر کو زلزلے کے شدید جھٹکے محسوس کیے گئے۔ ریکٹر اسکیل پر زلزلے کی شدت 6.4 ریکارڈ کی گئی۔ محکمہ موسمیات نے زلزلے کی تصدیق کی ہے، تاہم، شدید زلزلے کے باوجود سونامی کی وارننگ جاری نہیں کی گئی ہے۔ محکمہ موسمیات کے مطابق زلزلہ آج مقامی وقت کے مطابق صبح 10.29 بجے آیا۔ جس کا مرکز کیپولان مینتوئی ضلع کے 116 کلومیٹر شمال مغرب میں اور سمندر کے نیچے 10 کلومیٹر کی گہرائی میں واقع تھا۔

آج سینسیکس تقریباً 1500 پوائنٹس نیچے ہے اور نفٹی 370 پوائنٹس کی گراوٹ کے ساتھ کھلا ہے۔ آئی ٹی انڈیکس 1000 سے زائد پوائنٹس کی کمی کے ساتھ کھلا۔ روپیہ اپنی اب تک کی کم ترین سطح 80.12 کو چھو گیا ہے جو خوف و ہراس میں اضافہ کر رہا ہے۔

سون بھدر: اتر پردیش کے سون بھدرا ضلع کے پیپرکھنڈ علاقے میں بس اور ٹرک میں زبردست ٹکر ہوگئی۔ اس حادثے میں کم از کم 24 افراد زخمی ہوگئے ہیں۔ زخمیوں میں سے سات کی حالت نازک ہے اور انہیں ضلع اسپتال ریفر کر دیا گیا ہے، جب کہ باقی کا علاج کمیونٹی ہیلتھ سینٹر میں کیا جا رہا ہے۔