کوٹا میں ایک دن میں دو طلبہ کی خودکشی، جنوری میں 6 اموات

راجستھان کے تعلیمی مرکز کوٹا میں بدھ کے روز ایک ہی دن میں دو طلبہ نے خودکشی کر لی، جس کے ساتھ ہی جنوری کے پہلے 22 دنوں میں ایسے 6 واقعات ہو چکے ہیں۔ پولیس کے مطابق خودکشی کرنے والوں میں ایک 24 سالہ نیٹ کی تیاری کرنے والی طالبہ اشفا شیخ، جو گجرات کے احمدآباد سے تعلق رکھتی تھی اور دوسرا 18 سالہ جے ای ای کا امیدوار تھا جو آسام کے گوہاٹی سے آیا تھا۔

اشفا شیخ نے اپنے کرائے کے کمرے میں صبح 10 بجے کے قریب پھانسی لگا لی۔ پولیس کے مطابق اشفا کئی بار میڈیکل میں داخلے کی کوشش کر چکی تھی لیکن ناکام رہی تھی۔ اب وہ خود سے پڑھائی کر رہی تھی۔ پولیس کو اس کے کمرے سے کوئی سوسائیڈ نوٹ نہیں ملا اور اس قدم کی وجہ معلوم نہیں ہو سکی۔

دو گھنٹے بعد مہاویر نگر علاقے میں آسام کے طالب علم نے اپنے ہاسٹل کے کمرے میں لوہے کے اینگل سے پھانسی لگا لی۔ ضلع انتظامیہ کے رہنما اصولوں کے مطابق ہاسٹل کے کمروں میں خودکشی روکنے کے آلات لگائے گئے تھے لیکن طالب علم نے اینگل استعمال کر کے اپنی جان لے لی۔

پولیس نے بتایا کہ جے ای ای امیدوار کو اگلے ہفتے امتحان دینا تھا اور اس کی والدہ اس کی دیکھ بھال کے لیے کوٹا آنے والی تھیں، لیکن اس نے اپنی والدہ کے پہنچنے سے پہلے ہی یہ قدم اٹھا لیا۔

رواں سال کوٹا میں یہ چھٹی خودکشی ہے۔ گزشتہ سال 2024 میں شہر میں طلبہ کی خودکشی کے 17 واقعات سامنے آئے تھے۔ کوٹا میں بڑھتے دباؤ اور طلبہ کی ذہنی صحت کے مسائل پھر سے بحث کا موضوع بن گئے ہیں۔