’جن کی کوئی تاریخ نہیں وہ دوسروں کی تاریخ مٹانے چلے ہیں‘، نہرو میموریل کا نام بدلنے پر کھڑگے کا شدید رد عمل

کانگریس صدر ملکارجن کھڑگے نے نہرو میموریل میوزیم اینڈ لائبریری کا نام بدل کر ’پرائم منسٹرس میوزیم‘ کرنے پر جمعہ کے روز بی جے پی حکومت پر سخت تنقید کی۔ انھوں نے کہا کہ جن کی کوئی تاریخ ہی نہیں ہے، وہ دوسروں کی تاریخ کو مٹانے چلے ہیں۔ کھڑگے نے کہا کہ ’’مودی حکومت کی پست سوچ ہندوستان کے تئیں ’ہند کے جواہر‘ کے عظیم الشان تعاون کو کم نہیں کر سکتی۔‘‘

ملکارجن کھڑگے نے ایک ٹوئٹ میں کہا کہ ’’نہرو میموریل میوزیم اینڈ لائبریری کا نام بدلنے کی کوشش سے جدید ہندوستان کے معمار اور جمہوریت کے بے خوف پہریدار پنڈت جواہر لال نہرو جی کی شخصیت کو کم نہیں کیا جا سکتا۔ اس سے صرف بی جے پی-آر ایس ایس کی کند ذہنیت اور تاناشاہی رویے کا پتہ چلتا ہے۔‘‘

کانگریس صدر کا یہ تبصرہ جمعرات کے روز نہرو میموریل میوزیم اینڈ لائبریری سوسائٹی کی ایک خصوصی میٹنگ میں اس کا نام بدلنے کا فیصلہ لیے جانے کے بعد آیا ہے۔ میٹنگ کی صدارت وزیر دفاع راجناتھ سنگھ نے کی جو سوسائٹی کے نائب سربراہ ہیں۔ سوسائٹی کے سربراہ وزیر اعظم نریندر مودی ہیں، اور اس کے 29 اراکین میں مرکزی وزیر امت شاہ، نرملا سیتارمن، دھرمیندر پردھان، جی کشن ریڈی اور انوراگ ٹھاکر بھی شامل ہیں۔

نہرو میموریل میوزیم اینڈ لائبریری کا افتتاح گزشتہ سال اپریل میں تین مورتی احاطہ میں کیا گیا تھا جو 1948 سے 1964 میں ان کے انتقال تک ملک کے پہلے وزیر اعظم جواہر لال نہرو کی سرکاری رہائش تھی۔ اسی لیے اس کا نام ان کے نام پر کیا گیا تھا، جسے اب مودی حکومت نے بدلنے کا فیصلہ کیا ہے۔