بلی تھیلے سے باہر، کیجریوال کا ہندوتوا کارڈ! کہا- ’نوٹ پر گاندھی کے ساتھ لکشمی اور گنیش کی بھی ہو تصویر‘

عام آدمی پارٹی کے سربراہ اور دہلی کے وزیر اعلی اروند کیجریوال نے پریس کانفرنس میں مرکزی حکومت سے اپیل  کی ہے کہ نوٹ پر گاندھی کے ساتھ لکشمی اور گنیش جی کی بھی تصویر ہو۔

اروند کیجریوال، تصویر عآپ
اروند کیجریوال، تصویر عآپ
user

قومی آوازبیورو

عام آدمی پارٹی کے کنوینر اور دہلی کے وزیر اعلی اروند کیجریوال نے آج مرکزی حکومت سے ایک اہم اپیل کی ہے۔ انہوں نے کہا کہ جہاں ملک کی کرنسی کمزور ہو رہی ہے وہیں معیشت بھی بدحالی کا شکار ہے۔ جب بھی ہم مصیبت میں آتے ہیں تو خدا یعنی بھگوان کو یاد کرتے ہیں۔ ہم دیوالی پر لکشمی اور شری گنیش کی پوجا کرتے ہیں۔

انہوں نے کہا کہ انتہائی سنگین حالات میں بھی ہم خدا (بھگوان) پر بھروسہ رکھتے ہیں۔ ایسے میں میری اپیل ہے کہ بابائے قوم مہاتما گاندھی کے ساتھ لکشمی اور شری گنیش جی کی تصویر ہندوستانی کرنسی یعنی نوٹوں پر چھاپی جائے۔ اس دوران کیجریوال نے کہا کہ نوٹ پر گاندھی جی کی تصویر ویسے ہی رکھی جائے، لیکن دوسری طرف دیوتاؤں کی تصویر لگائی جائے۔


 پریس کانفرنس کے دوران جب ان سے پوچھا گیا کہ ان پر ہندوتوا کارڈ کھیلنے کا الزام لگایا جا رہا ہے تو کیجریوال نے کہا کہ یہ الزامات لگتے رہتے ہیں لیکن سچائی کی طاقت کو کوئی کمزور نہیں کر سکتا۔ واضح رہے اس مطالبہ کے ذریعہ کیجریوال نے جہاں ہندتوا کارڈ کھیلا ہے وہیں انہوں نے بابائے قوم گاندھی جی کی اہمیت بھی کم کی ہے۔

اس کے علاوہ کیجریوال نے دہلی میں آلودگی اور ممکنہ کارپوریشن انتخابات پر بھی بات کی۔ انہوں نے کہا کہ ہم دہلی کو صاف ہوا والا شہر بنائیں گے۔ ہماری محنت کا نتیجہ نظر آرہا ہے اور اس بار دہلی کی آلودگی میں کمی آئی ہے۔


 کارپوریشن انتخابات سے متعلق سوال پر انہوں نے کہا کہ دہلی کے لوگ اب اپنے گھر کے ارد گرد صفائی چاہتے ہیں اور انہیں مسائل سے نجات ملنی چاہئے، اس لئے جب بھی انتخابات ہوں گے وہ ہمیں منتخب کریں گے۔

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔