کشمیر: شوپیاں اور بڈگام میں مسلح جھڑپیں، 3 ملی ٹینٹ اور ایک ایس پی او ہلاک

وادی کشمیر میں دو الگ الگ جگہوں پر ہونے والی مسلح جھڑپوں میں تین جنگجو اورایک ایس پی او ہلاک جبکہ پولیس کا ایک کانسٹیبل زخمی ہوا ہے

کشمیر میں تصادم کی فائل تصویر / یو این آئی
کشمیر میں تصادم کی فائل تصویر / یو این آئی
user

یو این آئی

سری نگر: وادی کشمیر کے جنوبی ضلع شوپیاں اور وسطی ضلع بڈگام میں جمعرات اور جمعہ کی درمیانی شب کو دو الگ الگ جگہوں پر ہونے والی مسلح جھڑپوں میں تین جنگجو اور جموں و کشمیر پولیس کا ایک ایس پی او ہلاک جبکہ پولیس کا ایک کانسٹیبل زخمی ہوا ہے۔ آخری اطلاعات ملنے تک دونوں جگہوں پر سکیورٹی فورسز کا آپریشن جاری تھا۔

سرکاری ذرائع نے بتایا کہ ضلع شوپیاں کے بادی گام میں ہونے والی مسلح جھڑپ میں لشکر طیبہ سے وابستہ تین جنگجو مارے گئے ہیں۔ انہوں نے بتایا کہ فوج اور جموں و کشمیر پولیس کی مشترکہ پارٹی نے علاقے میں جنگجوئوں کی موجودگی سے متعلق خفیہ اطلاع ملنے پر گذشتہ شام دیر گئے کارڈن اینڈ سرچ آپریشن شروع کیا تھا۔


سری نگر میں قائم فوج کی پندرہویں کور کے آفیشل ٹوئٹر ہینڈل پر بتایا کہ بادی گام میں مسلح جھڑپ کی جگہ سے دو اے کے رائفلیں اور ایک پستول برآمد کی گئی ہے۔

دریں اثنا ضلع بڈگام کے بیروہ میں جاری مسلح جھڑپ کے دوران جموں و کشمیر پولیس کا ایک ایس پی او ہلاک جبکہ ایک کانسٹیبل زخمی ہو گیا ہے۔ جموں و کشمیر پولیس نے مہلوک ایس پی او کی شناخت محمد الطاف اور زخمی کانسٹیبل کی شناخت منظور احمد کے طور پر ظاہر کی ہے۔

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔