کشمیر: ایک ہفتے کے بعد موسم ہوا خوشگوار، موسم پھر خراب رہنے کی پیش گوئی

سری نگر: وادی کشمیر میں بالائی علاقوں میں برف باری اور میدانی علاقوں میں بارشوں کا سلسلہ ایک ہفتے تک جاری رہنے کے بعد موسم میں بہتری واقع ہونا شروع ہوگئی ہے۔ محکمہ موسمیات کے ایک ترجمان کے مطابق وادی میں 19 اپریل کو موسم خشک رہنے کا امکان ہے تاہم بعد ازاں 20 اور21 اپریل کو کہیں کہیں بارشیں ہوں گی۔ انہوں نے کہا کہ وادی میں 22 اپریل کو موسلا دھار بارشیں متوقع ہیں جبکہ 23 اپریل کو بھی موسم قدرے ناساز ہی رہے گا تاہم 24 اپریل سے موسم بہتر ہونے کا امکان ہے۔ دریں اثنا وادی میں پیر کے روز موسم خشک و خوشگوار رہا اور صبح سے ہی آفتاب نمودار رہا۔

موسم میں بہتری کے ساتھ ہی لوگوں خاص کر کسان طبقے سے وابستہ لوگوں نے راحت کی سانس لی ہیں۔ موسلا دھار بارشوں کے باعث وادی کے شہر وگام کی سڑکیں زیر آب ہیں جس سے لوگوں کو چلنے پھرنے میں مشکلات کا سامنا ہے۔ لوگوں کا کہنا ہے کہ سڑکوں پر ہوئے گہرے گڑھے پانی سے بھرے ہوئے ہیں، جبکہ باقی حصے کیچڑ سے بھرے ہوئے جس کی وجہ سے لوگوں کا چلنا پھرنا مشکل ہی نہیں، بلکہ خطرناک بھی بن گیا ہے۔

انہوں نے کہا کہ ناقص ڈرینیج سسٹم اور غیر معیاری میگڈا مائزیشن سڑکوں کی موجودہ صورتحال کی بنیادی وجہ ہے۔ محکمہ موسمیات کے مطابق گرمائی دارلحکومت سری نگر جہاں گزشتہ چوبیس گھنٹوں کے دوران 9.6 ملی میٹر بارش ریکارڈ ہوئی ہے، میں کم سے کم درجہ حرارت 7.6 ڈگری سینٹی گریڈ ریکارڈ کیا گیا۔

وادی کے مشہور ترین سیاحتی مقام گلمرگ جہاں گزشتہ چوبیس گھنٹوں کے دوران 7.0 ملی میٹر بارش ریکارڈ ہوئی ہے، میں کم سے کم درجہ حرارت منفی 0.5 ڈگری سینٹی گریڈ ریکارڈ کیا گیا جبکہ وادی کے دوسرے مشہور سیاحتی مقام پہلگام جہاں گزشتہ چوبیس گھنٹوں کے دوران 16.7ملی میٹر بارش ریکارڈ ہوئی ہے، میں کم سے کم درجہ حرارت 1.4 ڈگری سینٹی گریڈ ریکارڈ ہوا ہے۔

سرحدی ضلع کپوارہ جہاں گزشتہ چوبیس گھنٹوں کے دوران 8.0 بارش ریکارڈ ہوئی ہے، میں کم سے کم درجہ حرارت 4.8 ڈگری سینٹی گریڈ ریکارڈ کیا گیا جبکہ کشمیر کے گیٹ وے ٹاؤن سے جانے والے قصبہ قاضی گنڈ جہاں گزشتہ چوبیس گھنٹوں کے دوران 4.0 ملی میٹر بارش ریکارڈ ہوئی ہے، میں کم سے کم درجہ حرارت 7.4 ڈگری سینٹی گریڈ ریکارڈ کیا گیا۔ جنوبی کشمیر کے ککرناگ جہاں گزشتہ چوبیس گھنٹوں کے دوران 4.8 ملی میٹر بارش ریکارڈ ہوئی ہے، میں کم سے کم درجہ حرارت 4.4 سینٹی گریڈ ریکارڈ کیا گیا۔