پٹرول-ڈیزل کی بڑھی قیمتوں کے خلاف راہل کا ’روڈ شو‘

کرناٹک میں انتخابی دورے کے درمیان کانگریس کے قومی صدر راہل گاندھی نے پٹرول و ڈیزل کی بڑھی ہوئی قیمتوں کے خلاف کولار میں روڈ شو کیا۔

اس روڈ شو سے قبل کانگریس سربراہ راہل گاندھی نے مودی حکومت کو نشانہ بناتے ہوئے ایک ٹوئٹ کیا جس میں کہا کہ سال 2014 سے اب تک بی جے پی نے پٹرول، ڈیزل اور گیس پر 10 لاکھ کروڑ ٹیکس وصول کیے ہیں۔ انھوں نے ایک ویڈیو بھی ٹوئٹ کیا۔ کانگریس سربراہ نے کہا کہ ’’یہ ویڈیو مودی حکومت کے دور اقتدار میں بڑھی تیل کی قیمتوں کی حقیقت کو ظاہر کرتا ہے۔‘‘ اس ویڈیو میں بتایا گیا ہے کہ دنیا میں لگاتار پٹرول و ڈیزل کی قیمتیں گھٹ رہی ہیں لیکن ہندوستان میں کوئی کمی دیکھنے کو نہیں ملی ہے۔

ویڈیو کے ذریعہ راہل گاندھی نے وزیر اعظم نریندر مودی کو یاد دلایا کہ 2014 سے پہلے انھوں نے کہا تھا کہ حکومت کی ناکامیوں کی وجہ سے لگاتار تیل کی قیمتیں بڑھ رہی ہیں۔

کولار کے بعد راہل گاندھی بنگلورو کے دیہی اضلاع کا دورہ کریں گے۔ بڑھتی مہنگائی کے مدنظر مودی حکومت کو گھیرنے کے لیے کانگریس سربراہ راہل گاندھی دوپہر 2.30 بجے بنگلورو دیہی ضلع میں ہوساکوٹے ڈسٹرکٹ اسٹیڈیم میں نکڑ جلسہ بھی کریں گے۔

قابل ذکر ہے کہ کرناٹک میں 12 مئی کو انتخابات ہونے ہیں۔ انتخابات ایک ہی مرحلے میں ہوں گے اور 15 مئی کو ووٹ شماری ہوگی۔ 2019 لوک سبھا انتخابات سے قبل ہونے والے کرناٹک اسمبلی انتخاب کو کافی اہم تصور کیا جارہا ہے۔