کانپور تشدد: پیغمبر اسلام پر نازیبا تبصرہ کرنے کے معاملہ میں بی جے پی لیڈر گرفتار

کانپور: پیغمبر اسلام حضرت محمدؐ پر نازیبا تبصرہ کے سلسلہ میں یوپی پولیس نے بی جے پی لیڈر کو گرفتار کر لیا ہے۔ پولیس نے یہ کارروائی کانپور تشدد کے بعد کی ہے۔ گرفتار کئے گئے بی جے پی لیڈر کا نام ہرشت سریواستو ہے اور وہ بی جے پی کی نوجوان ونگ (بھارتیہ جنتا یوا مورچہ) کا سابق ضلع سکریٹری ہے۔

’این ڈی ٹی وی‘ پر شائع رپورٹ کے مطابق پولیس یہ کارروائی سوشل میڈیا پر اشتعال انگیز پوسٹ کرنے کے سلسلہ میں کی ہے۔ کانپور کے پولیس کمشنر وجے مینا نے کہا کہ جو کوئی بھی مذہبی جذبات کے ساتھ کھلواڑ کرے گا، ہم اس کے خلاف کارروائی کریں گے۔

خیال رہے کہ بی جے پی لیڈران نوپور شرما اور نوین کمار جندل کی طرف سے کئے گئے تبصرے پر تنازعہ اب تک جاری ہے۔ ایران، عراق، کویت، قطر، سعودی عرب، اومان، یو اے ای، اردن، افغانستان، بحرین، مالدیپ، لیبیا، انڈونیشیا، ملیشیا سمیت کم از کم 16 ممالک نے متنازعہ تبصرہ پر ہندوستان کے سامنے اپنا احجاج درج کرایا ہے۔ وہیں بی جے پی نے اپنی قومی ترجمان نوپور شرما کو معطل کر دیا ہے، جبکہ پارٹی کی دہلی یونٹ کے میڈیا انچارج نوین کمار جندل کو برطرف کر دیا گیا ہے۔

غورطلب ہے کہ کانپور تشدد کے بعد یوپی حکومت نے بڑا قدم اٹھاتے ہوئے 21 آئی اے ایس افسران کا تبادلہ کیا ہے۔ کانپور کی ڈی ایم نیہا شرما کا بھی تبادلہ کر دیا گیا ہے۔ کانپور، اترپردیش میں جمعہ کے روز پیغمبر اسلام کے خلاف بی جے پی ترجمان کے توہین آمیز ریمارکس کے خلاف احتجاج میں تشدد پھوٹ پڑا تھا۔ متنازعہ بیان کے خلاف احتجاج میں جمعہ کی نماز کے بعد دکانیں بند کرانے کے دوران دو فرقوں کے لوگوں نے ایک دوسرے پر پتھراؤ کیا۔ اس پر قابو پانے کے لیے پولیس کو لاٹھی چارج کرنا پڑا۔ پولیس نے اس تشدد کے سلسلے میں 30 سے ​​زائد افراد کو گرفتار کیا ہے۔