سونے کی اسمگلنگ کرتے ہوئے کنڑ اداکارہ گرفتار، 14.80 کلو سونا ضبط، 14 دنوں کی عدالتی حراست میں بھیجی گئیں

سونے کی اسمگلنگ کے معاملے میں بنگلورو کے ڈائریکٹوریٹ آف ریونیو انٹلیجنس (ڈی آرآئی) نے بڑی کارروائی کرتے ہوئے کنڑ اداکارہ رانیا راؤ کو کیمپ گوڑا بین الاقوامی ہوائی اڈے پر ان کے قبضے سے 14.8 کلوگرام سونا ضبط کرنے کے بعد گرفتار کر لیا۔ رانیا اپنی لگاتار انٹرنیشنل دوروں کی وجہ سے ڈی آر آئی کی نظر میں تھیں۔ وہ 3 مارچ کی رات دبئی سے ایمیریٹس کی فلائٹ سے بنگلورو پہنچی تھی۔

ڈی آر آئی کے افسروں نے بتایا کہ اداکارہ رانیا نے زیادہ تر سونا اپنے جسم میں پہنا ہوا تھا۔ ساتھ ہی انہوں نے اپنے کپڑوں میں گولڈ بارس (سونے کی چھڑیں) چھپا رکھی تھیں۔ بتایا جاتا ہے کہ رانیا ایک آئی پی ایس کی بیٹی ہے، جو حال میں کرناٹک پولیس کے ہاؤسنگ کارپوریشن کے ڈی جی پی کے طور پر کام کر رہے ہیں۔

ڈی آر آئی کے مطابق ہوائی اڈے پر پہنچنے پر رانیا راؤنے خود کو ڈی جی پی کی بیٹی بتایا تھا اور خود کو گھر ڈراپ کرنے کے لیے مقامی پولیس اہلکاروں کو بلاتی تھیں۔ ڈی آر آئی اب اس بات کی جانچ کر رہی ہے کہ کیا ان پولیس اہلکاروں کی اسمگلنگ نیٹ ورک میں کوئی شمولیت تھی یا انجانے میں ان کا استعمال کیا جا رہا تھا۔

ڈی آر آئی نے یہ نوٹ کیا تھا کہ رانیا گزشتہ 15 دنوں میں چار بار دبئی کا سفر کر چکی ہیں۔ اس سے ایجنسی کو شک ہوا۔ ڈی آر آئی نے اداکار کی سرگرمیوں پر نظر رکھنی شروع کردی۔ ایجنسی کو خفیہ جانکاری ملی کہ وہ اپنے ساتھ بڑی مقدار میں سونا لے کر دبئی سے بنگلورو آ رہی ہے۔ اس خفیہ اِنپٹ پر کارروائی کرتے ہوئے ایجنسی نے اداکارہ کا رانیا کو کیمپے گوڑا انٹرنیشنل ایئرپورٹ پہنچتے ہی روک لیا اور ان کی تلاشی لی جس میں 14.8 کلوگرام سونا ان کے پاس سے ضبط ہوا۔ اس سونے کی بازار میں قیمت 12 کروڑ روپے ہے۔

منگل کی شام رانیا کو عدالت میں پیش کیا گیا جہاں سے انہیں 14 دنوں کی عدالتی حراست میں بھیج دیا گیا ہے۔ جانچ افسروں کو شبہ ہے کہ وہ بنگلورو ہوائی اڈے کے ذریعہ فعال طور پر چل رہے ایک سونے کے اسمگلنگ گروہ کا حصہ ہے۔

قابل ذکر ہے کہ رانیا فلم 'مانکیہ' میں کنڑ سپر اسٹار سدیپ کے ساتھ اپنے رول کے لے جانی جاتی ہیں۔ انہوں نے دیگر جنوبی ہند کی فلموں میں بھی کام کیا ہے۔