کملیش تیواری کی آخری رسوم ادا، افسران نے اہل خانہ سے کیا سی ایم یوگی سے ملاقات کرانے کا وعدہ

18 اکتوبر کو لکھنؤ میں قتل کیے گئے ہندوتوا لیڈر کملیش تیواری کی بیوی وزیر اعلیٰ یوگی آدتیہ ناتھ سے ملاقات کے بعد ہی کملیش کی آخری رسوم ادا کرنا چاہتی تھیں اور ملاقات نہ ہونے کی صورت میں خود سوزی کی بات کہہ رہی تھیں، لیکن وہ بالآخر اپنی ضد سے پیچھے ہٹ گئیں۔ سرکاری افسران کے کافی سمجھانے کے بعد گھر والوں نے کملیش تیواری کی آخری رسوم ادا کر دی، لیکن اس سے پہلے سرکاری افسران کے سامنے انھوں نے اپنے کئی مطالبات رکھے۔

میڈیا ذرائع کا کہنا ہے کہ کملیش تیواری کے آبائی گھر سیتا پور میں ہی اس کی آخری رسوم ادا کی گئیں۔ اس موقع پر لکھنؤ اور سیتا پور کے کئی پولس افسران موجود تھے۔ لکھنؤ کے کمشنر مکیش میشرام اور آئی جی نے اس سے قبل کملیش تیواری کے گھر والوں سے ملاقات کی اور انھیں بھروسہ دلایا کہ ان کے مطالبات پورے کیے جائیں گے۔ دوپہر تقریباً 2 بجے کملیش کا جسد خاکی آخری رسوم ادا کرنے کے لیے لے جایا گیا۔

خبروں کے مطابق کملیش کے اہل خانہ نے افسروں سے مطالبہ کیا ہے کہ این آئی اے اور ایس آئی ٹی کے ذریعہ اس قتل معاملے کی جانچ کرائی جائے کیونکہ انھیں یو پی پولس پر بھروسہ نہیں ہے۔ اس کے ساتھ ہی گھر والوں نے ریاستی حکومت سے معاوضہ دینے کے ساتھ ساتھ کملیش کے بیٹے کو ملازمت دینے کا مطالبہ بھی کیا۔

انسپکٹر جنرل ایس کے بھگت نے میڈیا سے کہا کہ ’’کملیش کے گھر والوں کا مطالبہ تھا کہ وہ وزیر اعلیٰ یوگی آدتیہ ناتھ سے ملاقات کرنا چاہتے ہیں۔ میں نے ان سے وعدہ کیا ہے کہ ملاقات کرائی جائے گی لیکن وقت کا تعین بعد میں ہوگا۔‘‘ ملاقات کا بھروسہ دلائے جانے کے بعد کملیش کی بیوی نے آخری رسوم ادا کرنے کے لیے رضامندی ظاہر کی۔ یہ بات ابھی طے نہیں ہے کہ وزیر اعلیٰ کملیش کے گھر والوں سے ملنے سیتا پور آئیں گے یا پھر گھر والوں کو ہی لکھنؤ لے جایا جائے گا۔

واضح رہے کہ پولس نے کملیش تیواری قتل واقعہ سلجھانے کا دعویٰ کیا ہے۔ گجرات اے ٹی ایس کا دعویٰ ہے کہ تین ملزمین نے اپنا گناہ قبول کر لیا ہے۔ گجرات اے ٹی ایس کے ڈی آئی جی ہمانشو شکلا کا کہنا ہے کہ حراست میں لیے گئے تینوں ملزمین نے اپناگناہ قبول کر لیا ہے۔ یو پی پولس کے ڈی جی نے بھی کہا ہے کہ تینوں سازش کرنے والوں نے اپنے ملوث ہونے کی بات قبول کر لی ہے۔