کمل ناتھ نے بی جے پی لیڈر اوما بھارتی کو ’بھارت جوڑو یاترا‘ میں شرکت کی دی دعوت

مدھیہ پردیش کانگریس کمیٹی کے چیف اور سابق وزیر اعلیٰ کمل ناتھ نے ہفتہ کے روز بی جے پی کی سینئر لیڈر اوما بھارتی کو راہل گاندھی کی قیادت میں چل رہی ’بھارت جوڑو یاترا‘ میں شامل ہونے کی دعوت دی۔ کمل ناتھ نے یہ پیش قدمی اوما بھارتی کے اس تبصرہ پر رد عمل ظاہر کرتے ہوئے کی کہ ’’بی جے پی حکومت میں نسل پرستی کا عدم توازن ہے‘‘۔

دراصل جمعہ کے روز بھوپال میں اپنی سرکاری رہائش پر ایک پریس کانفرنس سے خطاب کرتے ہوئے اوما بھارتی نے دعویٰ کیا کہ مختلف ذاتوں اور علاقوں کےلیڈران کو وہ جگہ نہیں دی جاتی جس کے وہ حقدار ہیں اور یہ آنے والے دنوں میں بی جے پی کے لیے ایک بڑا مسئلہ پیدا کر سکتا ہے۔

اوما بھارتی کے بیان پر اپنا رد عمل ظاہر کرتے ہوئے اور بی جے پی کو تنقید کا نشانہ بناتے ہوئے کمل ناتھ نے کہا کہ ’’میں اوما بھارتی کے اس بیان سے متفق ہوں کہ مدھیہ پردیش میں نسل پرستی کا عدم توازن ہے۔ سماجی انصاف وقت کا مطالبہ ہے۔ آنے والے دنوں میں اگر اوما بھارتی کانگریس کی ’بھارت جوڑو یاترا‘ میں شامل ہوتی ہیں تو میں ان کا استقبال کروں گا۔‘‘

کانگریس کے سرکردہ لیڈروں میں شامل کمل ناتھ نے کہا کہ کانگریس نے 34 سیل (محکمے) بنائے ہیں تاکہ سبھی مذاہب اور ذاتوں سے جڑے لوگوں کو اصل دھارے کی سیاست میں جوڑا جا سکے اور انھیں اپنے گروپ کی نمائندگی کرنے کے یکساں مواقع مل سکیں۔

اس درمیان کمل ناتھ نے راہل گاندھی کی ٹی شرٹ پر تبصرہ کرنے کے لیے بھی بی جے پی کی تنقید کی۔ انھوں نے کہا کہ ’’آج بی جے پی راہل گاندھی کی ٹی شرٹ دیکھ رہی ہے... وہ دن دور نہیں جب وہ (بی جے پی لیڈر) ان کے (راہل گاندھی کے) جوتوں پر تبصرہ کریں گے۔ وہ ’بھارت جوڑو یاترا‘ کی حمایت کرنے والے لوگوں کو نہیں دیکھ رہے ہیں۔‘‘