جھارکھنڈ: گملا میں سلامتی دستوں اور نکسلیوں میں تصادم، جے جے ایم پی کے 3 نکسلی ڈھیر، کئی اسلحے برآمد

جھارکھنڈ کے گملا ضلع کے بشن پور تھانہ حلقہ کے کیچکی جنگل میں بدھ کو سلامتی دستوں اور نکسلیوں کے درمیان زبردست تصادم ہوا۔ اس میں جے جے ایم پی کے تین فعال انتہاپسند مارے گئے جبکہ جائے وقوع سے پولیس نے کثیر تعداد میں اسلحہ برآمد کیا۔ تصادم کے بعد علاقے میں تلاشی مہم چلائی جا رہی ہے۔

پولیس ذرائع کے مطابق مارے گئے نکسلیوں کی شناخت لوہر دگا ضلع کے سینہا باشندہ لالو لوہرا، گملا ضلع کے سجیت اُراؤں اور لاتیہار ضلع کے ہوشیر گاؤں باشندہ چھوٹو اُراؤں کے طور پر کی گئی ہے۔ ان میں دو 5 لاکھ کے انعامی سب زونل کمانڈر تھے۔ تینوں نکسلی کافی عرصے سے انتہاپسند تنظیم جے جے ایم پی سے جڑے تھے اور گملا، لوہردگا سمیت آس پاس کے علاقوں میں نکسلی واقعات کو انجام دینے میں فعال کردار ادا کرتے تھے۔

گملا ایس پی ہریش نے اطلاع دی ہے کہ بدھ کی صبح سلامتی دستوں کو خفیہ اطلاع ملی تھی کہ کیچکی جنگل میں جے جے ایم پی کے انتہا پسند جمع ہوکر کسی بڑی واردات کو انجام دینے کا منصوبہ بنا رہے ہیں۔ اطلاع ملنے پر پولیس اور نیم فوجی دستوں کی مشترکہ ٹیم موقع پر پہنچی، جس کے بعد دونوں طرف سے شدید گولی باری شروع ہو گئی۔ تصادم کے دوران تین نکسلی موقع پر ہی ڈھیر ہو گئے۔

تصادم کے مقام کی تلاشی کے دوران پولیس نے کئی اسلحے برآمد کیے ہیں۔ ان میں اے کے-56 رائفل، ایک ایس ایل آر اور ایک انساس رائفل شامل ہیں۔ پولیس افسروں کا ماننا ہے کہ اتنے جدید اسلحوں کا ملنا صاف اشارہ ہے کہ انتہا پسند تنظیم علاقے میں بڑے واقعہ کو انجام دینے کی فراق میں تھا۔ اسلحہ کی برآمدگی تنظیم کی نیت اور اس کی فعالیت کو ظاہر کرتا ہے۔ سلامتی دستوں کی اس کارروائی کو نکسلی مخالف مہم کے لیے بڑی کامیابی مانا جا رہا ہے۔