جھارکھنڈ کے وزیر اعلیٰ ہیمنت سورین نے 319 اساتذہ اور 17 خاتون نگرانوں کو تقرری خطوط سونپے

جھارکھنڈ کے وزیر اعلیٰ ہیمنت سورین نے پیر کو رانچی کے پروجیکٹ بھون میں منعقدہ ایک ریاستی تقریب میں 319 انٹر اور گریجویٹ تربیت یافتہ اسسٹنٹ اساتذہ اور 17 خاتون سپروائزرز (نگرانوں) کو تقرری کے خطوط سونپے۔ اس موقع پر وزیر اعلیٰ ہیمنت سورین نے کہا کہ ریاست میں گزشتہ 4 مہینوں کے اندر صرف محکمہ تعلیم میں 9000 سے زائد اساتذہ کی بحالی کی جا چکی ہے اور آئندہ 2 سے 4 مہینوں کے اندر مختلف سرکاری محکموں میں ہزاروں نئے عہدوں پر تقرریاں کی جائیں گی۔

وزیر اعلیٰ نے تقرری نامہ حاصل کرنے والے امیدواروں سے کہا کہ سرکاری ملازمت صرف تنخواہ پانے کا ذریعہ نہیں ہے بلکہ سماج اور ریاست کی ترقی میں تعاون دینے کی ذمہ داری بھی ہے۔ انہوں نے اساتذہ سے خاص طور پر دیہی اور دور دراز کے علاقوں میں خدمات انجام دینے کی اپیل کی۔ ساتھ ہی انہو ںے کہا کہ اکثر شکایت ملتی ہے کہ کچھ اساتذہ دور دراز کے گاؤں میں جانے سے کتراتے ہیں، جبکہ اصل ضرورت انہی علاقوں میں ہے۔ وزیر اعلیٰ نے دعویٰ کیا کہ اب تک ان کی حکومت ڈیڑھ سے 2 لاکھ تقرریاں دے چکی ہے، لیکن اب بھی کئی عہدوں پر بحالی کی ضرورت ہے۔

جھارکھنڈ کے وزیر اعلیٰ نے اپنے خطاب کے دوران ریاست میں غذائی قلت کے مسئلے کو بھی ایک بڑا چیلنج قرار دیا۔ انہوں نے کہا کہ غذائی قلت جیسے چیلنجوں کو دور کرنے میں خواتین سپروائزروں اور اساتذہ کا اہم کردار ہوگا۔ ساتھ ہی انہوں نے کہا کہ حکومت کا مقصد ایک ایسی نسل تیار کرنا ہے جو صحت مند، تعلیم یافتہ اور خود کفیل ہو۔ اس موقع پر حکومت کی سماجی تحفظ کی اسکیموں کی پیش رفت سے متعلق بتایا گیا کہ فی الحال ریاست کی تقریباً 50 سے 60 لاکھ خواتین کو ’مئیاں سمان یوجنا‘ کے تحت ہر ماہ براہ راست ان کے بینک کھاتوں میں مالی امداد بھیجی جا رہی ہے۔ تقریب میں موجود پارلیمانی امور کے وزیر رادھا کرشن کشور اور وزیر سنجے یادو نے بھی نو تقرر شدہ ملازمین سے خطاب کیا۔ انہوں نے کہا کہ تقرری نامہ ملنے کے ساتھ ہی معاشرے کو ایک نئی سمت دینے کی ذمہ داری اب نوجوانوں کے کندھوں پر ہے۔