جے پور: مزدوروں سے بھری بس میں بھیانک آتشزدگی، 2 کی موت، 12 جھلس گئے
جے پور کے ضلع کلکٹر جتیندر سونی نے جائے وقوعہ پر بتایا کہ یہ بس یوپی کے پیلی بھیت سے آ رہی تھی، جس میں تقریباً 65 لوگ سوار تھے۔ اسے جائے حادثہ سے تقریباً 200-300 میٹر دور اینٹ کے ایک بھٹے پر جانا تھا
راجستھان کی راجدھانی جے پور میں پیش آنے والے ایک اور ہولناک حادثہ میں مزدوروں کو لے جا رہی ایک نجی بس میں اچانک آگ لگ گئی، جس میں دو لوگوں کی موت ہو گئی جبکہ تقریباً 12 افراد بری طرح جھلس گئے۔ رپورٹ کے مطابق، یہ حادثہ بس کے ہائی ٹینشن تار کو چھونے کے سبب جے پور شہر سے 65 کلو میٹر دور منوہر پور علاقے میں رونما ہوا۔ بس میں 5 سے 6 گیس سلنڈر بھی رکھے ہوئے تھے۔ آگ لگنے کے بعد ان گیس سلینڈروں میں دھماکہ ہوا جس سے بس پوری طرح جل کر راکھ ہو گئی۔ زخمیوں میں 5 کی حالت نازک بتائی جا رہی ہے۔ اس وجہ سے ہلاکتوں میں اضافے کا خدشہ ظاہر کیا گیا ہے۔
خبر رساں ایجنسی آئی اے این ایس کی رپورٹ کے مطابق یہ بس اترپردیش کے مزدوروں کو لے کر شاہ پورہ کے ٹوڈی واقع اینٹ بھٹے کی طرف جا رہی تھی۔ راستے میں اوور ہیڈ سے گزرتے وقت بس 11,000 وولٹ کی الیکٹرک لائن سے ٹکرا گئی جس سے زور دار دھماکہ ہوا اور بس میں کرنٹ دوڑ گیا۔ دیکھتے ہی دیکھتے بس میں آگ لگ گئی جس سے مزدوروں میں چیخ پکار مچ گئی۔ کافی مشقت کے بعد محکمہ فائر بریگیڈ کی ٹیم نے آگ پر قابو پایا۔
واقعہ کی اطلاع ملتے ہی منوہر پور پولیس تھانہ کے اہلکار اور انتظامی افسران موقع پر پہنچ گئے۔ پولیس نے مقامی لوگوں کی مدد سے ریسکیو آپریشن شروع کردیا اور جھلسنے والے مزدوروں کو شاہ پورہ ضلع اسپتال میں داخل کرایا گیا۔ وہاں سے سنگین طور پر زخمی 5 مزدوروں کو جے پور کے ایس ایم ایس اسپتال ریفر کردیا گیا۔
پولیس نے متوفیوں کی لاشیں پوسٹ مارٹم کے لیے مورچری میں رکھوا کر معاملے کی تفتیش شروع کر دی ہے۔ ابتدائی تحقیقات سے سامنے آیا ہے کہ بس ڈرائیور کو سڑک کی اونچائی اور اوپر سے گزرنے والی لائن کا اندازہ نہیں تھا جس کی وجہ سے یہ خوفناک حادثہ پیش آیا۔ جے پور کے ضلع کلکٹر جتیندر سونی نے جائے وقوعہ پر بتایا کہ یہ بس یوپی کے پیلی بھیت سے آرہی تھی، اس میں تقریباً 65 لوگ سوار تھے۔ اسے جائے حادثہ سے تقریباً 200-300 میٹر دور اینٹ کے ایک بھٹے پر جانا تھا۔ انہوں نے کہا کہ دو تین لوگ نیچے اترے ڈرائیور کو بتانے کے لئے کہ وہ دھیرے دھیرے آئے کیونکہ بجلی کا تار ہے لیکن اسی دوران تار بس سے چھوگیا۔
اس دردناک حادثے پر راجستھان کے وزیر اعلی بھجن لال شرما نے افسوس کا اظہار کیا ہے۔ ’ایکس‘پوسٹ کے ذریعہ وزیراعلیٰ شرما نے کہا کہ منوہر پور، جے پور میں بس حادثے میں جانی نقصان کی خبر انتہائی افسوسناک ہے۔ متعلقہ افسران کو زخمیوں کے مناسب علاج کو یقینی بنانے کی ہدایت کی گئی ہے۔ پربھو سے دعا ہے کہ وہ متوفیوں کی روحوں کو اپنی پناہ میں جگہ دے اور زخمیوں کو جلد از جلد صحت یاب کرے۔
سابق وزیر اعلیٰ اور کانگریس کے سینئر لیڈر اشوک گہلوت نے بھی حادثے پر اپنے رنج وغم کا اظہار کیا۔ انہوں نے’ ایکس‘ پوسٹ میں لکھا کہ منوہر پور، جے پور میں مزدوروں سے بھری بس ہائی ٹینشن لائن چھونے کے بعد آگ کی زد میں آگئی، اس میں دو لوگوں کی موت اور کئی دیگر کے زخمی ہونے کی خبر افسوسناک ہے۔ انہوں نے کہا کہ راجستھان میں آئے دن حادثہ ہونے سے عام لوگ اپنی جان گنوارہے ہیں، یہ تشویشناک ہے۔ میں سوگوار خاندانوں کے ساتھ گہری تعزیت کرتا ہوں اور زخمیوں کی جلد صحت یابی کی دعا کرتا ہوں۔